ევროკავშირის საბჭოს თავმჯდომარემ, დონალდ ტუსკმა დაუშვა ბრექსიტის ხანმოკლე ვადით გადატანა
ევროკავშირის საბჭოს თავმჯდომარემ, დონალდ ტუსკმა დაუშვა ბრექსიტის ხანმოკლე ვადით გადატანა. მაგრამ მხოლოდ იმ შემთხვევაში, თუკი დიდი ბრიტანეთის პარლამენტი მოიწონებს ადრე შეთანხმებულ გარიგებას ბრიუსელთან. ევროკავშირიდან დიდი ბრიტანეთის ორგანიზებული გასვლის იმედი სუსტია, მაგრამ ევროკავშირი კვლავაც შეეცდება ამის მიღწევასო, დასძინა ტუსკმა.
ოთხშაბათს დიდი ბრიტანეთის პრემიერ-მინისტრმა ტერეზა მეიმ ოფიციალურად მოითხოვა ევროკავშირიდან ქვეყნის გასვლის გადადება 30 ივნისამდე. დონალდ ტუსკისადმი მიწერილ წერილში მან აღნიშნა, რომ ემზადება ევროკავშირიდან გასვლის შესახებ შეთანხმების თაობაზე პარლამენტის მესამე კენჭისყრისთვის.
თავდაპირველად ევროკავშირიდან დიდი ბრიტანეთის გასვლა 29 მარტისთვის იყო დანიშნული. მაგრამ ბრიტანეთის დეპუტატებმა ორჯერ უკუაგდეს ბრიუსელთან ტერეზა მეის გარიგება. ამასთან, პარლამენტმა მხარი არ დაუჭირა ევროკავშირიდან გასვლას გარიგების გარეშე და ბრექსიტის გადატანას მიემხრო.