ტრანსგენდერების ხილვადობის დღეს მანიფესტის კითხვით გამოეხმაურებიან
31 მარტს ტრანსგენდერი ადამიანების ხილვადობის დღე აღინიშნება. ლგბტქი თემი წევრებმა ამ დღისთვის სიმბოლური აქცია დაგეგმეს - ტრანსგენდერი თემის მანიფესტის კითხვა.
ისინი სთავაზობენ ყველა მხარდამჭერს, სახლში იქნებიან ისინი, სამსახურში თუ მეგობართან, ჩართონ ფეისბუკლაივი და წაიკითხონ მანიფესტი და ასე გამოხატონ საკუთარი მხარდაჭერა ტრანსგენდერი ადამიანების მიმართ.
მანიფესტში წერია, რომ ტრანსგენდერ ადამიანებს ყოველდღიურად უწევთ ფიზიკური და ფსიქოლოგიური ძალადობის ატანა მათი გარეგნობისა და გენდერული გამოხატვის გამო, რომ ჯანდაცვის სისტემა არ არის მორგებული მათ საჭიროებებზე - არ აძლევს ჰორმონოთერაპიისა და სქესის შეცვლის ოპერაციის საშუალებას. რომ ისინი ასევე ვერ იღებენ სიცოცხლისათვის საჭირო სამედიცინო სერვისებს და რომ ტრანსგენდერ ადამიანებზე არ ზრუნავს სახელმწიფო.
მანიფესტის ტექსტში ასევე წერია:
სახელმწიფო ტრანსგენდერი ადამიანებისთვის არ უზრუნველყოფს შეკრებისა და მანიფესტაციის უფლებას. რის გამოც ტრანსგენდერი ადამიანების აბსოლუტურ უმრავლესობას გამუდმებით შიშში იატაკქვეშ უწევს ცხოვრება.
ტრანსგენდერი ადამიანებისთვის სახელმწიფო ვერ უზრუნველყოფს საგანმანათლებლო დაწესებულებებში უსაფრთხო და თანასწორ გარემოს. რის გამოც ისინი ვერ იღებენ სრულფასოვან განათლებას.
ტრანსგენდერ ადამიანებს სახელმწიფო არ აძლევს დასაქმების საშუალებას, არ იცავს მათ დისკრიმინაციისგან სამსახურში. რის გამოც ტრანსგენდერი ადამიანების უმრავლესობა იძულებულია ჩაერთოს სექს-სამუშაოში.
ტრანსგენდერი ადამიანებს აქვთ საცხოვრებლის პრობლემა. მათი ყოფა არაადამიანური, დამამცირებელი და გაუსაძლისია!
თუმცა ეს არ არის მხოლოდ ტრანსგენდერი ადამიანების პრობლემა! თუ შენ ხარ დაუსაქმებელი, ან დასაქმებული დაბალანაზღაურებად სამსახურში, თუ შენი უფლებები ირღვევა შენს სამუშაო ადგილას, თუ შენ არ მიგიწვდება ხელი ჯანდაცვასა და საჭირო მედიკამენტებზე, თუ შენ ვერ იღებ განათლებას, თუ შენ იჩაგრები შენი გენდერის ან განსხვავებულობის გამო, შენ არ უნდა გაჩუმდე!
თემის წევრები და აქციის ორგანიზატორები მოუწოდებენ მხარდამჭერებს არ შეეგუონ უსამართლობას და შემოუერთდნენ მათ ბრძოლაში.