სალომე ზურაბიშვილი პანკისზე: ჰესის მშენებლობას გეოლოგიური კვლევა უნდა ამყარებდეს
"ყველას კარგად გვესმის, რომ ქვეყანას სჭირდება ეკონომიკური წინსვლა. მაგრამ, ამავე დროს, აუცილებელია, ჰესის მშენებლობის გადაწყვეტილებას ამყარებდეს სრულყოფილი გეოლოგიური კვლევა, საფრთხეების კომპლექსური შეფასება და საზოგადოების ჩართულობა", - ასე გამოეხმაურა საქართველოს პრეზიდენტი სალომე ზურაბიშვილი პანკისის ხეობაში განვითარებულ მოვლენებს 22 აპრილს გამართულ ბრიფინგზე.
ზურაბიშვილმა იმედი გამოთქვა, რომ მომავალში სახელმწიფო სწორედ ამ მიმართულებით იმოქმედებს და სახელმწიფოს გაძლიერებისთვის მნიშვნელოვან პროექტებს ისე განახორციელებს.
საქართველოს პრეზიდენტის განცხადებით, ნებისმიერ სახელმწიფოში მიუღებელია პოლიციელებზე ძალადობა:
"მითუმეტეს, მიუღებელია ისეთ ქვეყანაში, რომელსაც აქვს ოკუპირებული ტერიტორიები და რომლისთვისაც საზღვრების დაცულობა და სტაბილურობა სასიცოცხლო მნიშვნელობის ამოცანაა", - განაცხადა სალომე ზურაბიშვილმა.