მართლმადიდებელი ქრისტიანები აღდგომის დღესასწაულს აღნიშნავენ
მართლმადიდებელი ქრისტიანები აღდგომის დღესასწაულს აღნიშნავენ. საქართველოს კათოლიკოს-პატრიარქი ილია მეორე სააღდგომო ეპისტოლით ულოცავს მას მორწმუნეებს და აღდგომას მოიხსენიებს გამაერთიანებლად "კაცობრიობის წარსულის, აწმყოსი და მომავლისა".
28-29 აპრილს ამ რელიგიურ დღესასწაულთან დაკავშირებით, შინაგან საქმეთა სამინისტრო თბილისში სასაფლაოების მიმდებარე გზებზე შეზღუდვებს აწესებს.
საბურთალოს, კუკიის, მუხათგვერდის და თბილისის ზღვის სასაფლაოების მიმართულებით ავტომანქანები შემდეგი მარშრუტებით იმოძრავებენ:
საბურთალოს სასაფლაოსთან ავტომანქანებით მისვლა შესაძლებელი იქნება ვაჟა-ფშაველას გამზირიდან სანდრო ეულის ქუჩისა და უნივერსიტეტის ქუჩის გავლით. სასაფლაოს ტერიტორიას ავტომანქანები უნივერსიტეტის ქუჩით, თამარაშვილის ქუჩის მიმართულებით დატოვებენ.
კუკიის სასაფლაოს მიმართულებით მოძრაობა შესაძლებელი იქნება ჩიტაიას მოედნიდან, ნორიოს აღმართისა და მამარდაშვილს ქუჩის გავლით. სასაფლაოს ტერიტორიას ავტომანქანები ცაიშის, ქვალონის, აბაშიძის და 9 ძმის ქუჩებით დატოვებენ.
მუხათგვერდის სასაფლაოსკენ ავტომანქანებისთვის მოძრაობა შესაძლებელი იქნება როგორც დავით აღმაშენებლის ხეივნიდან, ასევე, ფარნავაზ მეფის გამზირიდან.
თბილისის ზღვის სასაფლაოს მიმართულებით, ავტომანქანებისთვის მოძრაობა ნებადართული იქნება ხუდადოვის და ანაპის დივიზიის ქუჩებით, ასევე, თემქის მხრიდან. სასაფლაოდან წამოსვლა შესაძლებელი იქნება მუხრანის, ბეჟანიშვილისა და ხუდადოვის ქუჩებით.
საპატრულო პოლიცია სატვირთო ავტომანქანების მძღოლებსაც აფრთხილებს. აღდგომის დღესასწაულთან დაკავშირებით რეგიონების საავტომობილო გზებზე მოძრაობის შეფერხების თავიდან ასაცილებლად, თბილისი-სენაკი-ლესელიძის საავტომობილო მაგისტრალზე, სატვირთოების გადაადგილება პერიოდულად შეიზღუდება.