ბრიტანეთში ლეიბორისტულმა პარტიამ შეწყვიტა ბრექსიტზე მოლაპარაკება კონსერვატორებთან
ბრიტანეთში შეწყდა მოლაპარაკება მმართველ კონსერვატიულ პარტიასა და ოპოზიციურ ლეიბორისტულ პარტიას შორის, მას შემდეგ, რაც მხარეებმა ვერ მიაღწიეს კომპრომისულ შეთანხმებას ქვეყნის ევროკავშირიდან გასვლის პირობების შესახებ.
ლაიბორისტულმა პარტიამ 17 მაისს განაცხადა, რომ დაასრულა მოლაპარაკება პრემიერ-მინისტრ ტერეზა მეისთან და თქვა, რომ შეთანხმება ვერ შედგა მეის სუსტი პოზიციების გამო, პერიოდში, რომელიც შესაძლოა მისი ხელისუფლებაში ყოფნის ბოლო კვირები იყოს.
ლეიბორისტების ლიდერის, ჯერემი კორბინის თქმით, მეისთან აზრთა უთანხმოების გადალახვა ვერ მოხერხდა. კორბინი ასევე ეჭვს გამოთქვამს, რომ მეის შემცვლელი დაიცავდა შეთანხმებას, რომელიც შესაძლოა ამ შეხვედრას მოჰყოლოდა. კორბინი ამბობს, რომ ლეიბორისტული პარტია კვლავაც შეეწინააღმდეგება მთავრობის მიერ მიღწეულ ბრექსიტის შეთანხმებას.
ბრიტანეთის პარლამენტმა სამჯერ უარყო მეის მიერ ბრიუსელთან მიღწეული შეთანხმება ევროკავშირიდან ბრიტანეთის გასვლის პირობების შესახებ. ივნისის დასაწყისში შეთანხმება კენჭისყრაზე კიდევ ერთხელ დადგება.
თავდაპირველი გეგმით, ბრიტანეთი ევროკავშირიდან მარტის ბოლოს უნდა გასულიყო. შემდეგ ახალ თარიღად 31 ოქტომბერი გამოცხადდა.