ზელენსკის მრჩევლის ვარაუდით, უკრაინაში ივლისში გაიმართება რიგგარეშე საპარლამენტო არჩევნები
უკრაინის პრეზიდენტი ვოლოდიმირ ზელენსკი ხელს მოაწერს ბრძანებულებას პარლამენტის მალე დათხოვნისა და რიგგარეშე არჩევნების 21 ივლისს, ან დაახლოებით ამ პერიოდში დანიშვნის შესახებ. ამის შესახებ განაცხადა პრეზიდენტის მრჩეველმა ანდრეი ბოჰდანმა.
პრეზიდენტად ინაუგურაციის მომდევნო დღეს, 21 მაისს, ზელენსკი პარლამენტის დათხოვნის გეგმაზე ესაუბრა საკანონმდებლო ორგანოს თავმჯდომარე ანდრეი პარუბისა და საპარლამენტო ფრაქციების ხელმძღვანელებს.
შეხვედრის შემდეგ კი მისმა მრჩეველმა აღნიშნა, რომ პრეზიდენტი „უახლოეს მომავალში“ მოაწერს ხელს ბრძანებულებას პარლამენტის დათხოვნის შესახებ.
ხოლო ზელენსკიმ შეხვედრის შემდეგ თქვა, რომ გადაწყვეტილი აქვს პარლამენტის დათხოვნა და ვადამდელი არჩევნების დანიშვნა. „პარლამენტის დათხოვნის მთავარი მიზეზია მოქალაქეების ძალიან დაბალი ნდობა ამ ინსტიტუტის მიმართ - სულ 4%“, - განაცხადა უკრაინის ახალმა პრეზიდენტმა.
ქვეყნის მმართველი კოალიცია „ევროპული უკრაინა“ 2014 წლის ნოემბერში შეიქმნა პეტრო "პოროშენკოს ბლოკის", "სახალხო ფრონტის", "სამოპომიჩის", "ბატკივშჩინისა" და "რადიკალური პარტიის" მონაწილეობით. მათგან ბოლო სამი 2015-2016 წლებში ჩამოშორდა მმართველ გუნდს.
უკრაინის კონსტიტუციით, არჩევნები უნდა ჩატარადეს არაუგვიანეს ორ თვეში პარლამენტის დათხოვნის შესახებ ბრძანებულებაზე ხელის მოწერის შემდეგ.