რუსეთის უშიშროების სამსახურის უფროსი ხედავს საფრთხეს ავღანეთში მყოფი ექსტრემისტებისაგან
რუსეთის უშიშროების ფედერალური სამსახურის (FSB) უფროსის, ალექსანდრ ბორტნიკოვის ინფორმაციით, ექსტრემისტების გაერთიანება „ისლამური სახელმწიფოს“ მებრძოლები თავს იყრიან ჩრდილოეთ ავღანეთში, ცენტრალური აზიის ყოფილი საბჭოთა რესპუბლიკების საზღვრებთან.
FSB-ს უფროსმა ამის შესახებ განაცხადა 21 მაისს, ავღანეთის მოსაზღვრე ტაჯიკეთში ვიზიტის დროს. რუსეთი წლებია აცხადებს, რომ არსებობს ცენტრალური აზიის ტერიტორიაზე „ისლამური სახელმწიფოს“ წევრების მოხვედრის საფრთხე.
ექსპერტების შეფასებით, რუსეთი აზვიადებს რიცხვებს, როცა ექსტრემისტების რაოდენობაზე ლაპარაკობს, რათა გაამართლოს კონტაქტები ავღანელ თალიბებთან და დაარწმუნოს ცენტრალური აზიის მთავრობები, რომ თავდაცვისათვის რუსეთის დახმარება სჭირდებათ.
ამერიკელი სამხედროების მონაცემებით, ავღანეთში იმყოფება „ისლამური სახელმწიფოს“ 2000-მდე მებრძოლი. ხოლო ბორტნიკოვის ინფორმაციით, 5000-მდე ექსტრემისტი გადაადგილდა ავღანეთის ჩრდილოეთი პროვინციების მიმართულებით.