წინასაარჩევნო პერიოდში ჩვენ ვიხილეთ უპრეცენდენტო ზეწოლა და კომისიის საქმიანობაში უხეში ჩარევა
„წინასაარჩევნო კამპანიის წარმოების წესების დარღვევის ფარგლებში ცესკო-ში, რაც შეეხებოდა კამპანიას, მხოლოდ და მხოლოდ 2 განცხადებაა,“ – ეს განცხადება ცესკო-ს თავმჯდომარემ, თამარ ჟვანიამ პარლამენტში გააკეთა.
თამარ ჟვანიას დეპუტატები ინტერპელაციის წესით უსმენენ. „ნაციონალურ მოძრაობას“ აინტერესებს, რა რეაგირებას ახდენს ცესკო საარჩევნო კამპანიის დროს მომხდარ დარღვევებზე.
თამარ ჟვანიას თქმით, წინასაარჩევნო კამპანიის წარმოების წესების დარღვევის ფარგლებში ცესკოში შევიდა 2 საჩივარი.
„2019 წლის 19 მაისის რიგგარეშე და შუალედური არჩევნების პერიოდში, რომელიც გაიმართა 12 საარჩევნო ოლქში, წინასაარჩევნო კამპანიის წარმოების წესების დარღვევის ფარგლებში ცესკო-ში, რაც შეეხებოდა კამპანიას, მხოლოდ და მხოლოდ 2 განცხადება, საჩივარი და დარღვევის შესახებ განცხადება არის შემოსული. ერთი მოგახსენებთ, რომ საარჩევნო კოდექსის შესაბამისად, ჩვენ მოგვმართა აგიტაციის გაწევის და აგიტაციაში მონაწილეობის უფლება, რომ არ გააჩნიათ საარჩევნო კომისიის წევრებს, ეს ალბათ მოგეხსენებათ და სწორედ აღნიშნული განაწესის სავარაუდო დარღვევის ფაქტთან დაკავშირებით ჩვენ მოგვმართა 16 აპრილს სამართლიანი არჩევნების და დემოკრატიული საზოგადოების აღმასრულებელმა დირექტორმა განცხადებით, რომელშიც მიუთითებდა, ეს ეხებოდა მთაწმინდის საოლქო საარჩევნო კომისიის წევრის, პირადი სოციალური ქსელის მეშვეობით გაწეულ შესაძლო წინასაარჩევნო აგიტაციას და საკითხის შესწავლის შედეგად დადგინდა, რომ საერთოდ არ იყო იქ სამართალდარღვევა.
„რაც შეეხება მეორე განცხადებას… 17 მაისს, მოქალაქე მარიამ მელქაძემ მოგვმართა განცხადებით, ანალოგიურად, ესეც ეხებოდა მთაწმინდის ოლქის სამოქმედო ტერიტორიას, ნომერ პირველ მაჟორიტარულ საარჩევნო ოლქს, პარლამენტის წევრობის ერთ-ერთი მაჟორიტარი კანდიდატის მიერ ზემოთხსენებული წესების სავარაუდო დარღვევის ფაქტთან დაკავშირებით. საკითხის შესწავლის შედეგად აქაც არ დადგინდა სამართალდარღვევა, ვინაიდან, მთლიანობაში, შეიძლება ცხადად ითქვას, რომ არც პროგრამა და არც სააგიტაციო ბეჭდვითი მასალა არ შეიცავდა ისეთ ინფორმაციას, რომელიც ეწინააღმდეგებოდა სარჩევნო კოდექსის 45-ე მუხლით დადგენილ მოთხოვნას,“ – განაცხადა თამარ ჟვანიამ.
ამას გარდა, თამარ ჟვანიამ აღნიშნა, რომ წინასაარჩევნო პერიოდში ცესკო-ში 156 განცხადება/საჩივარი.
„კამპანიასთან დაკავშირებით ზოგადად, წინასაარჩევნო პერიოდში, დამატებით მინდა მოგაწოდოთ ინფორმაცია, რომ ზემოთხსენებული კონკრეტული განცხადებების, პრეტენზიების, საჩივრების და ინფორმაციის გარდა, მთლიანობაში, როგორც ცესკო-ში, ისე საოლქო საარჩევნო კომისიებში, სულ შემოსული გახლდათ 156 განცხადება/საჩივარი, წინასაარჩევნო პერიოდს ვგულისხმობ და არა მხოლოდ საკამპანიო განცხდება/საჩივრებს,“ – განაცხადა ჟვანიამ.
თამარ ჟვანიამ ასევე, აღნიშნა, რომ უპრეცენდენტო ზეწოლა მიმდინარეობდა კომისიების საქმიანობაზე.
„წინასაარჩევნო პერიოდში ჩვენ ვიხილეთ უპრეცენდენტო ზეწოლა და კომისიის საქმიანობაში უხეში ჩარევა და მე ვფიქრობ, რომ პარლამენტი არის ზუსტად ის ადგილი, სადაც ამ საკითხებზე უნდა მიდიოდეს მსჯელობა, როდესაც კომისიის საქმიანობას ეშლებოდა ხელი და მის საქმიანობაში ხდებოდა უხეში ჩარევა,“ – განაცხადა ჟვანიამ.