ნინო ბოლქვაძე: სამართლებრივ სახელმწიფოში ვცხოვრობთ, თუ ისევ – თეოკრატიულში
აქტივისტი და თბილისი პრაიდის ერთ-ერთი ორგანიზატორი ნინო ბოლქვაძე პრემიერს, პრეზიდენტს, შინაგან საქმეთა მინისტრს და პარლამენტის ვიცე სპიკერს მოუწოდებს, გააკეთონ განცხადებები და დააფიქსირონ საკუთარი პოზიცია ლგბტ უფლებებთან დაკავშირებით.
"ორგანიზაცია, რომელიც თავის თავს ქართულს უწოდებს, სინამდვილეში არის მარგინალური, ფაშისტური, ძალადობრივი დანაშაულებრივი ორგანიზაცია. ეს ორგანიზაცია აკეთებს საჯარო განცხადებებს, რომელიც საზოგადოების გახლეჩვისკენ არის მიმართული.
დღეს საპატრიარქოს განცხადება იყო 2013 წლის 17 მაისის წინ გაკეთებული განცხადების მსგავსი, რომლებიც ჩვენს ჯგუფს არ განიხილავს ადამიანებად და გვეუბნებოდნენ, რომ არ მიგვიჩნევენ სიცოცხლის დაცვის ღირსად. „ღირსების მარშის“ ორგანიზატორებმა გადავწყვიტეთ, რომ საზოგადოებამ იცოდეს, როგორ ნაწილდება პასუხისმგებლობები. მივმართავთ საჯარო მოხელეებს, შს მინისტრს გიორგი გახარიას, პრეზიდენტს სალომე ზურაბიშვილს, პარლამენტის ვიცე-სპიკერს თამარ ჩუგოშვილს, პრემიერ-მინიტრს მამუკა ბახტაძეს, დააფიქსირონ საკუთარი პოზიცია, ჩვენ ვცხოვრობთ სამართლებრივ სახელმწიფოში, თუ ისევ – თეოკრატიულ სახელმწიფოში“, – განაცხადა ნინო ბოლქვაძემ მთავრობის კანცელარიასთან აქციაზე, რომელიც თბილისი პრაიდის საორგანიზაციო ჯგუფმა მას შემდეგ დაგეგმა, რაც საპატრიარქომ პრაიდის საწინააღმდეგო განცხადება გაავრცელა.
მთავრობის კანცელარიასთან თბილისი პრაიდის ორგანიზატორების აქციის პარალელურად კონტრაქცია მიმდინარეობს, რომელსაც ულტრამემარჯვენე ჯგუფები აწყობენ. აქციების მსვლელობისას დაკავებულია 5 ადამიანი.