„ევროპული საქართველო“: ერთი ჯგუფის თავისუფლების შეზღუდვა, ყველას თავისუფლების შეზღუდვაა
კანცელარიასთან მიმდინარე აქციისა და კონტრაქციის თაობაზე „ევროპული საქართველო“ განცხადებას ავრცელებს.
„ქართული ოცნების მთავრობა განაგრძობს მოძალადე და პროპუტინური ჯგუფების წახალისებას და მათთვის ხელის დაფარებას.
დღეს მთავრობის კანცელარიასთან მოქალაქეთა ჯგუფს, რომლებიც ადამიანის უფლებებს იცავს, გამოხატვის თავისუფლება შეუზღუდეს. კანონის დაცვის ნაცვლად, ხელისუფლებამ არჩევანის გაკეთება გადაწყვიტა და მოძალადე, პრორუსული ჯგუფების მხარე დაიჭირა.
მთავრობა საკუთარ თავს უფლებას აძლევს, პოლიტიკური ინტერესის შესაბამისად შეუზღუდოს ადამიანებს შეკრების, გამოხატვის და გადაადგილების თავისუფლება.
სამწუხაროდ, ეს არაა პირველი შემთხვევა როცა მთავრობა პოლიტიკურ პარტნიორებად ძალადობრივ ჯგუფებს განიხილავს და მათ უპირატეს მდგომარეობაში აყენებს საქართველოს დანარჩენ მოქალაქეებთან.
ევროპული საქართველო მხარს უჭერს ყველა მოქალაქის, მათ შორის ლგბტქ ადამიანების გამოხატვის თავისუფლებას. თავისუფლება საქართველოს ყველა მოქალაქეს ეკუთვნის. ერთი ჯგუფის თავისუფლების შეზღუდვა, ყველას თავისუფლების შეზღუდვაა. თავისუფალი ქვეყანა ისაა, სადაც ყველას და მათ შორის ლგბტქ ადამიანებს აქვთ ღირსეულად და თავისუფლად ცხოვრების შესაძლებლობა“, - წერია „ევროპული საქართველოს“ განცხადებაში.
მთავრობის კანცალარიასთან „თბილისი პრაიდის“ ორგანიზატორებმა ხელშეშლის მიუხედავად აქციის გამართვა მაინც მოახერხეს. აქცია „პრაიდის“ ორგანიზატორებმა მას შემდეგ დაგეგმეს, რაც 14 ივნისს გავრცელდა საპატრიარქოს განცხადება, სადაც საპატრიარქოს წარმომადგენლები მოუწოდებენ ხელისუფლებას არ დაუშვან თბილისში პრაიდის ჩატარება.
„თბილისი პრაიდის“ ორგანიზატორების მიერ მთავრობის კანცელარიასთან დაგეგმილ აქციაზე „ქართული მარშის“ „მართლდადიდებელ მშობლეთა კავშირის“ წარმომადგენლები, ლევან ვასაძე, სასულიერი პირები მივიდნენ. ისინი არ აძლევდნენ „თბილისი პრაიდის“ ორგანიზატორებს აქციის ჩაატარების საშუალებას.