დღეს შინდისის ბრძოლიდან 11 წელი შესრულდა
დღეს, 11 აგვისტოს პატივს მიაგებენ შინდისის ბრძოლაში დაღუპული გმირების ხსოვნას. გორის რაიონის სოფელ შინდისში გმირთა მემორიალთან დილიდან იკრიბებიან დაღუპულთა ოჯახის წევრები, მთავრობისა და ადგილობრივი თვითმმართველობების წარმომადგენლები.
შინდისის ბრძოლიდან 11 წელი გავიდა. 2008 წლის 11 აგვისტოს სოფელ შინდისის რკინიგზის სადგურთან საქართველოს შეიარაღებული ძალების მეორე ქვეითი ბრიგადის საინჟინრო ოცეული უთანასწორო ბრძოლაში ჩაება რუსულ მოტომსროლელ ასეულთან, რომელიც სადგურთან ახლოს იყო ჩასაფრებული.
ბრძოლამ დაახლოებით ერთი საათი გასტანა. შინდისის ბრძოლაში 17 ჯარისკაცი დაიღუპა. შინდისის გმირები არიან: ალექსანდრე ონიანი, ემზარ წილოსანი, ვეფხვია ჯიშკარიანი, ზვიად კაცაძე, თეიმურაზ ბერიძე, ილია გაბუნია, ილია შეყლაშვილი, ირაკლი ჯანელიძე, კახა კოშაძე, ლევან მელქაძე, მარლენ ბარამია, მიხეილ დვალიშვილი, ნიკოლოზ ფორჩხიძე, რომან ზოიძე, რუსლან წულაძე, ფელიქს კაკაურიძე და შმაგი კუპატაძე.