ჰონგ-კონგის პოლიციამ წყლის ჭავლი გამოიყენა და პირველად გაისროლა დემონსტრანტების წინააღმდეგ
25 აგვისტოს ჰონგ-კონგის პოლიციამ სამი თვის წინ დაწყებული საპროტესტო გამოსვლების განმავლობაში პირველად გამოიყენა წყლის ჭავლი და სავარაუდოდ, ერთმა თანამშრომელმა გაისროლა დემონსტრანტებსა და პოლიციას შორის შეტაკების დროს.
ეს იყო პროდემოკრატიული საპროტესტო გამოსვლების ერთ-ერთი ყველაზე ძალადობრივი ღამე ბოლო სამ თვეში.
დემონსტრაცია ცუნ ვანის რაიონში გადაიზარდა შეტაკებაში დემონსტრანტებსა და პოლიციას შორის.
ჩინეთის ნახევრად ავტონომიურ ოლქში, ჰონგ-კონგში, გამოსვლები დაიწყო 11 კვირის წინ, მოწოდებით გაეუქმებინათ კანონპროექტი, რომელიც დანაშაულში ეჭვმიტანილების ჩინეთისთვის მარტივად გადაცემას დააკანონებდა. შემდგომში გამოსვლები გაფართოვდა და მოთხოვნები გაიზარდა, რასაც მოჰყვა ჩინეთის მუქარა, რომ გულხელდაკრეფილი არ იქნებოდა.
ჰონგ-კონგის სუპერინტენდენტმა ლუნგ კოკ ვინმა განუცხადა ჟურნალისტებს, ერთმა კოლეგამ გაისროლაო. მისი თქმით, ეს იყო უნიფორმიანი პოლიციელი.
არ არის გარკვეული, ვის ესროლა სამართალდამცველმა, მაგრამ ეს იყო პირველი შემთხვევა საპროტესტო გამოსვლების დაწყებიდან.
25 აგვისტოს პოლიციამ განაცხადა, რომ შეტაკებებისას დააკავა 29 პირი.