აკრძალვის მიუხედავად, ყაზახეთში ოპოზიცია აქციებს მართავს
21 სექტემბერს ყაზახეთში აკრძალული ოპოზიციური მოძრაობა აქციებს მართავს, მიუხედავად ხელისუფლების მოქმედებებისა, რომელმაც უსანქციო აქციამდე რამდენიმე აქტივისტი დააპატიმრა. რადიო თავისუფლების ყაზახური სამსახურის თანახმად, დემონსტრაციები ტარდება დედაქალაქ ნურ-სულთანსა და უდიდეს ქალაქ ალმა-ატაში.
აქციების ორგანიზატორია ორგანიზაცია ყაზახეთის დემოკრატიული არჩევანი, რომლის ლიდერიც, მუხტარ აბლიაზოვი, საფრანგეთში ცხოვრობს. ის ძებნილია ყაზახეთის, რუსეთის და უკრაინის მიერ, 5 მილიარდამდე დოლარის გაფლანგვის ეჭვის საფუძველზე.
ყაზახეთის გენერალურმა პროკურატურამ 20 სექტემბერს მოქალაქეები გააფრთხილა, არ მიეღოთ მონაწილეობა დემონსტრაციაში და განაცხადა, რომ სამართალდამცველები "უკანონო აქციების აღსაკვეთად მკაცრ ზომებს გაატარებენ".
ალმა-ატაში დაფუძნებული უფლებადამცველი ორგანიზაცია, სამოქალაქო ინიციატივების კოალიცია ამბობს, რომ ბოლო ხუთ დღეში ქვეყანაში 50-მდე აქტივისტი დააკავეს და 7-დან 15 დღემდე მიუსაჯეს პატიმრობა, უსანქციო აქციების ორგანიზების ან მათში მონაწილეობის ბრალდებით.