პოლონეთში საპარლამენტო არჩევნები იმართება
13 ოქტომბერს პოლონეთში საპარლამენტო არჩევნები იმართება, რომელშიც, გავრცელებული მოლოდინით, გამარჯვებას იოლად მოიპოვებს იაროსლავ კაჩინსკის მმართველი პარტია, "კანონი და სამართალი".
პარტია არჩევნებს წარმოაჩენს როგორც არჩევანს ტრადიციულ კათოლიკურ ღირებულებებზე დაფუძნებულ საზოგადოებას და ლიბერალურ წესრიგს შორის, რომელიც პრივილეგირებულ პირებს აძლევს უპირატესობას და ძირს უთხრის ოჯახურ ცხოვრებას. პარტიამ ასევე მიზანში ამოიღო გეები და ლესბოსელები და მათ საფრთხედ გამოსახავს, იმ ფონზე, როცა ლგბტ მოძრაობა ძლიერდება და უფრო მეტად ჩანს საზოგადოებრივ ასპარეზზე.
პარტიის ოპონენტები აცხადებენ, რომ "კანონი და სამართალი" საფრთხეს წარმოადგენს პოლონეთის დემოკრატიისთვის, რადგან ის ძირს უთხრის სასამართლოს და მედიის დამოუკიდებლობას და საზოგადოებას უფრო შეუწყნარებელს ხდის უმცირესობებისადმი.
პარტიის პოპულარობა მნიშვნელოვნად ეფუძნება ხელგაშლილ სოციალურ ხარჯებს და პოლიტიკას. კაჩინსკის პარტიამ შეამცირა საპენსიო ასაკი, გაზარდა პენსიები და სუბსიდიები გლეხებისთვის, 26 წლამდე მოქალაქეებს დაუწესა საგადასახადო შეღავათები. ოჯახები თითო ბავშვზე 125 ამერიკული დოლარის ეკვივალენტურ თანხას, 500 ზლოტს იღებენ ყოველთვიურად.