ფილმის "და ჩვენ ვიცეკვეთ" ჩვენების საწინააღმდეგო აქციებზე 27 ადამიანი დააკავეს
შინაგან საქმეთა სამინისტრომ ოსკარზე წარდგენილი ფილმის "და ჩვენ ვიცეკვეთ" ჩვენების საწინააღმდეგო დემონსტრაციებზე 27 ადამიანი დააკავა.
"კანონდამრღვევი პირების დადგენისა და შესაბამისი სამართლებრივი რეაგირების მიზნით მიმდინარეობს ინციდენტების ამსახველი ფოტო-ვიდეო მასალების დამუშავება" , - აცხადებს შსს.
შსს-ს ცნობით, სამართალდამცავი ორგანოს თანამშრომლის კანონიერი მოთხოვნისადმი დაუმორჩილებლობისა და ხულიგნობის ბრალდებით 24 ადამიანი დააკავეს თბილისში, ხოლო 3 - ბათუმში. ფილმის ჩვენებისას აქციების დროს მომხდარ ინციდენტებთან დაკავშირებით 4 ფაქტზე დაიწყო გამოძიება:
ანა სუბელიანის ჯანმრთელობის დაზიანების ფაქტზე - დაკავებულია ერთი ბრალდებული;
დავით ბერძენიშვილზე თავდასხმის ფაქტზე;
პოლიციელებზე თავდასხმისა და ორი პოლიციელის დაშავების ფაქტზე;
შსს-ს კუთვნილი ავტომობილის დაზიანების ფაქტზე.
ულტრანაციონალისტური ჯგუფების პროტესტისა და კინოჩვენების ჩაშლის მუ ქარის მიუხედავად, გეი თემატიკის ფილმის "და ჩვენ ვიცეკვეთ" 8 ნოემბერს დაგეგმილი ყველა ჩვენება შედგა.
ლევან აკინის ფილმის ჩვენება საქართველოში გაიმართება 9 და 10 ნოემბერსაც და შსს აცხადებს, რომ მომდევნო დღეებშიც დაიცავს წესრიგს.