ლევან ღვინჯილია: მან ჩემი განთავისუფლების ბრძანება მაშინ დაწერა, როცა ჯერ კიდევ “ვირთხის” წელი იყო …
“~ თბილისის საკრებულოს წვრმა, ბატონმა ერეკლე კუხიანიძემ წამოაყენა წინადადება, რომ აფხაზეთის ა/რ მთავრობის თავმჯდომარე რუსლან აბაშიძესა და სახელმწიფო აკადემიურ ანსამბლ “აფხაზეთის” ყოფილ სამხატვრო ხელმძღვანელ ლევან ღვინჯილიას შორის გაიმართოს სატელევიზიო დებატები თემაზე – “რატომ გაათავისუფლეს თანამდებობიდან სამხატვრო ხელმძღვანელი”.
~ მე სიამოვნებით ვიღებ ამ წინადადებას და მზად ვარ, ნებისმიერი არხის პირაპირ ეთერში გავეპაექრო ზემოხსენებულ პირს.
~ მითუმეტეს, რომ დღემდე ჩემთვის ოფიციალურად ცნობილი არაა ჩემი განთავისუფლების მიზეზი;
~ ბევრი მეკითხება, მაგრამ ოფიციალური განმარტება ამ თემაზე ჯერ არ გაკეთებულა, განთავისუფლების ბრძანებაშიც ამაზე არაფერია ნათქვამი. ხოლო შემცვლელი უკვე დასახელდა.
~ წინასწარ პირობას ვდებ ტელემაყურებლის წინაშე, რომ ბატონი რუსლანის არც ერთ ენობრივ შეცდომაზე, რაც, ცხადია, უხვად მოუვა კამათის დროს, ყურადღებას არ გავამახვილებ, რომ არ დაიბნეს და აზრი არ აებურდოს.
~ გული მიგრძნობს, რომ ის ამ შეთავაზებას არ მიიღებს, მაგრამ მე ჩემს პოზიციას მაინც ვაფიქსირებ.
~ სოციალურ ქსელში გამოხატული მხარდაჭერისა და თანადგომისათვის კი საზოგადოების წარმომადგენლებს უღრმეს მადლობას მოგახსენებთ.
~ ყველას გილოცავთ 2021-ის შემოსვლას, მათ შორის ბატონ რუსლანსაც.
~ მან ჩემი განთავისუფლების ბრძანება მაშინ დაწერა, როცა ჯერ კიდევ “ვირთხის” წელი იყო; ერთი დღე რომ მოეთმინა, ვინ იცის, იქნებ “თეთრი ხარი” სხვა განწყობაზე დააყენებდა, მაგრამ მან, ჩემდა სამწუხაროდ, მაინც “ვირთხა” ამჯობინა {“სიყვარულს რას გაუგებ, ჩემო
ოლღა”?}.” – წერს სოციალურ ქსელში ენათმეცნიერი ლევან ღვინჯილია.
შეგახსენებთ, რომ რამდენიმე დღის წინ ღვინჯილიამ სოციალურ ქსელში დაწერა:
“აფხაზეთის ავტონომიური რესპუბლიკის მთავრობის თავმჯდომარე რუსლან აბაშიძისაგან დღეს მივიღე “ძვირფასი საახალწლო საჩუქარი” – აღარა ვარ სახელმწიფო აკადემიურ ანსამბლ “აფხაზეთის” სამხატვრო ხელმძღვანელი. “ეს ის ანსამბლია, სადაც, თანამოაზრე კოლეგებთან ერთად, გავატარე 6 წელიწადი. ანსამბლის თითოეულ წევრს ვულოცავ დამდეგ 2021-ს და ვუსურვებ სრულ ოჯახურ და პირად ბედნიერებას.”