ნავალნი აცხადებს, რომ პუტინის დავალებით მისთვის პირობითი პატიმრობის რეალურით შეცვლას აპირებენ
„პუტინი განრისხებულია იმით, რაც მე გამოვიკვლიე მის მიერ ორგანიზებული მოწამვლის შემდეგ და მან უბრძანა რუსეთის სასჯელაღსრულების ფედერალურ სამსახურს, რათა წასულიყო სასამართლოში ჩემთვის პირობითი პატიმრობის რეალურით შესაცვლელად, ახალი დანაშაულის ჩადენასთან დაკავშირებით. ეს მაშინ, როდესაც პირობითი სასჯელის ვადა 30 დეკემბერს ამოიწურა“, - დაწერა ტვიტერში ალექსეი ნავალნიმ.
სარჩელი სასამართლოში შევიდა ახალი წლის უქმეების შემდეგ პირველ სამუშაო დღეს, მაგრამ მისი განხილვის ვადა ჯერჯერობით არ ჩანიშნულა.
დეკემბრის ბოლოს რუსეთის საგამოძიებო კომიტეტმა სისხლის სამართლის საქმე აღძრა კრემლის კრიტიკოსის, ალექსეი ნავალნის წინააღმდეგ, მას ბრალს სდებენ მისი ანტიკორუფციული ორგანიზაციისთვის გადარიცხული მილიონობით რუბლის მითვისებაში.
ბრალდების დამტკიცების შემთხვევაში ნავალნის ხანგრძლივი პატიმრობა ემუქრება, და საქმის აღძვრა ეჭვქვეშ აყენებს მის რუსეთში დაბრუნებას. ნავალნი გერმანიაში იმყოფება მას შემდეგ, რაც აგვისტოში სამხედრო დონის ნერვული აგენტით იქნა მოწამლული.
თავად ნავალნიმ უგულებელყო მისთვის წაყენებული ეს ახალი ბრალდებები და მათ უწოდა მთავრობის შურისძიება იმის გამო, რომ ის მოწამვლას გადაურჩა და შემდეგ მოწამვლაში ჩართული პირები გამოააშკარავა. ნავალნი თავის მოწამვლას უწოდებს მკვლელობის მცდელობას სახელმწიფოს უშიშროების სამსახურების მხრიდან.
ნავალნი წლების განმავლობაში დეტალურად იძიებს კორუფციას მთავრობის მაღალ ეშელონებში, ის რამდენჯერმე იყო დაპატიმრებული მოკლე ვადით.