რუსეთმა 8 ადმინისტრაციული პროტოკოლი პირველად შეადგინა რადიო თავისუფლების წინააღმდეგ

რუსეთის მარეგულირებელმა უწყება „როსკომნადზორმა“ 12 იანვარს პირველი, 8 ადმინისტრაციული პროტოკოლი შეადგინა „უცხოეთის აგენტის“ შესახებ კანონის დარღვევისათვის მედიაკორპორაცია რადიო თავისუფალი ევროპა/რადიო თავისუფლების წინააღმდეგ.

„როსკომნადზორის“ ინფორმაციით, რთე/რთ არ ასრულებს უწყების 2020 წლის 30 ოქტომბრის ბრძანებას, რომელმაც არსებითად გაართულა ყველა პლატფორმაზე კონტენტის მარკირება.

რუსეთის კანონმდებლობით „უცხოეთის აგენტის“ სიაში მოხვედრა მასობრივ საინფორმაციო საშუალებას დამატებით შეზღუდვებს უწესებს, კერძოდ, ისინი ვალდებული არიან წარმოადგინონ თავიანთი საქმიანობის ფინანსური ანგარიშები და შესაბამის მარკირება გაუკეთონ თავიანთ პუბლიკაციებს საინფორმაციო საშუალებებში.

ადმინისტრაციულ სამართალდარღვევათა პროტოკოლები გადაეცემა სასამართლოს, რომელსაც შეუძლია 500 000 რუბლით დააჯარიმოს იურიდიული, ხოლო 50 000 -ით ფიზიკური პირები. ფინანსური დარღვევებისათვის გათვალისწინებული სანქციების საერთო თანხა, სავარაუდოდ, მიაღწევს რამდენიმე ათულ მილიონ რუბლს იმის გათვალისწინებით, რომ „როსკომნადზორმა“ რადიო თავისუფლებას გაუგზავნა „უცხოეთის აგენტის“ შესახებ კანონის დარღვევისათვის შედგენილი 130 პროტოკოლი.

რუსეთში 2017 წელს „უცხოეთის აგეტების“ სიაში შეიყვანეს რადიო თავისუფლება და მისი რეგიონული პროექტები, ასევე რუსულენოვანი არხი „ნასტოიაშჩეე ვრემია“ და მედიაკორპორაცია რადიო თავისუფალი ევროპა/ რადიო თავისუფლების რამდენიმე ქვედანაყოფი.

რადიო თავისუფალი ევროპა/რადიო თავისუფლების პრეზიდენტმა, ტედ ლიპიენმა, „როსკომნადზორის“ ამ ნაბიჯს უწოდა „დრამატული ესკალაცია“ და კვლავ დაადასტურა, რომ კორპორაცია მტკიცედ განაგრძობს თავისი მისიის შესრულებას რადიმოსმენელების წინაშე როგორც რუსეთში, ისე სხვაგან.