გურამ გვასალია: უკანა ეზოში დამარხული ოქრო უბრალოდ ქვაა და მეტი არაფერი
გურამ გვასალია დემნას ვეტმანიდან წასვლის შესახებ, ქართულ Forbes -თან ახალ ინტერვიუში:
“ყველაფერს თავისი დრო აქვს. ყველა დიზაინერის კარიერაში დგება დრო, როდესაც კონკრეტულ ბრენდში, ან პროექტზე მუშაობას ვადა გადის. შეხედეთ ჩვენი დროის კერპს, რაფ სიმონსს: მან ჯილ სანდერში ბრწყინვალედ იმუშავა, შემდეგ გადავიდა დიორში, შემდეგ კელვინ კლაინში და ახლა პრადას ხელმძღვანელობს. ალბათ პრადაც არ იქნება მისი ბოლო გაჩერება. ნებისმიერმა დიზაინერმა შესაძლებელია თავისი კარიერა დაასრულოს შანელში ან ზარაში, ან თუნდაც სადმე მათ შორის. ვინ იცის მომავალში რა იქნება?”
“ცხოვრებაში, ყოველთვის კარგია, როდესაც რამდენიმე სცენარისათვის ხარ მზად. პანდემიამ გვასწავლა, რომ თუ საკმარისად მონდომებით იმუშავებ, საჭირო გადაწყვეტებსაც იპოვი. ჩვენი ბიზნეს-მოდელი ადაპტირდა არსებულ სიტუაციასთან, გავაუმჯობესეთ მომარაგების ქსელი, გავაძლიერეთ ურთიერთობა ჩვენს მწარმოებლებსა და შემსყიდველ პარტნიორებთან. რეალურად, მოვახერხეთ, რომ გაყიდვების მაჩვენებელი გაგვეუმჯობესებინა. თუ მანქანა კარგად შეზეთილია, მუშაობას გააგრძელებს. როგორც ომის დროს გაზრდილ ბავშვსს, მე ცხოვრებაში ბევრად ცუდი რაღაცებიც მინახავს. ოჯახთან გატარებული დამატებითი დრო საჩუქარია. ადამიანები ისეთი დატვირთულები გავხდით, რომ დაგვავიწყდა, ზოგჯერ ნაკლები არის მეტი. ალბერტ აინშტაინმა ერთხელ თქვა, ცხოვრების ორი გზა არსებობს, პირველი – იფიქრო, რომ არაფერია სასწაული, მეორე – იფიქრო, რომ ყველაფერი სასწაულია. ცხოვრება სასწაულია. მოდი ყველაფერს ასე შევხედოთ.”
-Forbes: რას ურჩევდი იმ ქართველებს, რომლებსაც საზღვარგარეთ წარმატების მიღწევა სურთ?
-გურამ გვასალია: საქართველოს კულტურა ფენომენალურია, თუმცა, ის ასევე მეტად მოშვებულს გვხდის. შეიძლება იმიტომ, რომ ყოველთვის შეგვიძლია მეგობრების და ოჯახის იმედი გვქონდეს. ევროპაში ადამიანური ურთიერთობები არ არის ის, რასაც შეგიძლია დაეყრდნო, მისი იმედი გქონდეს. აქ შენ მარტო ხარ და ერთადერთი რამ, რასაც დახმარება შეუძლია გულმოდგინე შრომა და საქმისადმი თავდადებაა. ზოგადად, ძალიან მნიშვნელოვანია, რომ ნათელი სურათი გქონდეს წარმოდგენილი, თუ რა გინდა ცხოვრებაში. და რაც გინდა, არ შეიძლება იყოს ფულით სავსე ჩემოდანი. ფული მხოლოდ მიზნის მიღწევის საშუალებაა, მაგრამ ის არასოდეს უნდა იყოს თვითმიზანი. იოცნებეთ ლამაზ სახლზე, კარიერაზე. იოცნებეთ იმაზე რის შესაძენადაც ფული გჭირდებათ. უკანა ეზოში დამარხული ოქრო უბრალოდ ქვაა და მეტი არაფერი.
შეგახსენებთ, 2014 წელს ძმებმა დემნა და გურამ გვასალიებმა ბრენდი Vetements დააფუძნეს.