ენტონი ბლინკენი წარმომადგენელთა პალატის კომიტეტს აშშ-ის ახალი ადმინისტრაციის საგარეო პოლიტიკის პრიორიტეტებს აცნობს
მოსმენა ამ წუთებში მიმდინარეობს.
ბლინკენი სახელმწიფო მდივნის თანმდებობაზე პირველად წარდგა კანონმდებლების წინაშე და გამოსვლის შემდეგ, მათ შეკითხვებს უპასუხებს. თავიდან მან ჩამოთვალა საკითხები, თემები, რომელებსაც ბაიდენის ადმინისტრაცია პრიორიტეტულად თვლის და განაცხადა, რომ უმთავრესი პრიორიტეტი საგარეო პოლიტიკაში ის არის, თუ რას ნიშნავს ეს პოლიტიკა ამერიკელი მშრომელებისა და ოჯახებისთვის.
კორონავირუსის პანდემიის შეჩერებასთან, ეკონომიკურ და უსაფრთხოების თემებთან, ასევე ეფექტიანი საიმიგრაციო სისტემის შექმნის, კლიმატის ცვლილების საქმეში წვლილის შეტანასთან, მოკავშირეებთან და პარტნიორებთან ურთიერთობის გამყარებასთან ერთად ბლინკენმა ილაპარაკა რუსეთის, ჩინეთის და ირანის გარშემო.
ბლინკენმა განაცხადა, რომ ის ეთანხმება პრეზიდენტ ბაიდენს იმაში, რომ „ჩრდილოეთის ნაკადი-2“ გაზსადენი, რომელსაც რუსეთი აგებს, ცუდი საქმე. ბლინკენის აზრით, გაზსადენი, რომლის 95 პროცენტი აგებულია, საფრთხეს უქმნის პოლონეთს და უკრაინას. ვისურვებდი, თქვა ბლინკენმა, რომ არ ვყოფილიყავით ამ ვითარებაში, როცა მილსადენის 95 პროცენტი აგებულია.
აშშ-ის სტრატეგიის გარშემო საუბრისას, უფრო ადრე, 2 მარტს, ბლინკენმა როცა ჩინეთის, როგორც "აშშ-ის უდიდესი გეოპოლიტიკური გამოწვევის" გარშემო ლაპარაკობდა, ხაზი გაუსვა, რომ რუსეთი, ირანი და ჩრილოეთი კორეა ასევე წარმოადგენენ სერიოზულ გამოწვევას აშშ-სთვის, მაგრამ ისინი შეუდარებელი არიან იმ პოტენციურ საფრთხესთან, რომელსაც ჩინეთი შეიძლება წარმოადგენდეს.
სახელმწიფო მდივნის თქმით, ის მომავალ კვირაში იაპონიას და სამხრეთ კორეას ეწვევა, შემდეგ კი ალასკაში თავის ჩინელ კოლეგას შეხვდება. ბლინკენის თქმით, ეს იქნება მნიშვნელოვანი შესაძლებლობა წარვადგინოთ ბევრი საკითხი, რომელიც აშშ-ს აწუხებს და შევისწავლოთ, არის თუ არა შესაძლებელი თანამშრომლობა. ეს არ იქნება სტრატეგული დიალოგი ასეთი რამ მხოლოდ საგრძნობი წინსვლის შემთხვევაში შეიძლება მოხდეს, თქვა მან.
ირანთან დაკავშირებულ შეკითხვაზე, რომელიც დემოკრატმა წარმომადგენელმა კალიფორნიიდან, ბრედ შერმანმა დასვა, ბლინკენმა უპასუხა, რომ აშშ არ წავა დათმობაზე მხოლოდ იმისთვის, რომ ირანი მოლაპარაკების მაგიდასთან დაჯდეს.
აშშ-მა არაერთხელ განაცხადა, რომ ირანმა უნდა შეასრულოს თავისი ვალდებულება, რომელიც ნაკისრი აქვს 2015 წლის ბირთვული შეთანხმებით და მხოლოდ შემდეგ დაუბრუნდება აშშ შეთანხმებას, გააგრძელებს მოლაპარაკებას ირანთან სხვა თემებზე, როგორიცაა ბალისტიკური რაკეტების პროგრამა და რეგიონში მისი მოქმედება.
მიმდინარეობს ახალი ამბის განახლება.