კოსოვოს საკითხების ჰააგის ტრიბუნალის ორდერით დააკავეს UCK-ს ყოფილი მეთაური
კოსოვოს სპეციალისტთა პალატამ განაცხადა, რომ პიეტერს შალა 16 მარტს დააკავეს ბელგიაში და ჰააგაში მის გადაყვანას ელოდებიან.
კოსოვოს ტრიბუნალს სხვა დეტალები არ დაუსახელებია, მაგრამ განაცხადა, რომ მოგვიანებით მეტი ინფორმაცია გახდება ხელმისაწვდომი.
შალა კოსოვოს განთავისუფლების არმიის (UCK) ყოფილი მეთაურია.
კოსოვოს სპეციალისტთა პალატა შეიქმნა UCK-ს ყოფილი წევრების მიმართ გამოთქმული ბრალდებების გამოსაძიებლად. მათ მიმართ გაისმის ბრალდება, რომ 1998-99 წლებში კოსოვოს ომში სამხედრო დანაშაულები და კაცობრიობის წინაშე დანაშაულები აქვთ ჩადენილი.
ბრალდებულთა შორის არიან კოსოვოს ყოფილი პრეზიდენტი ჰაშიმ ტაჩი, პარლამენტის ყოფილი სპიკერი და კოსოვოს დემოკრატიული პარტიის ყოფილი ლიდერი კადრი ვესელი, პარლამენტის წევრი რეჯეპ სელემი და პარლამენტის ყოფილი სპიკერი იაკუპ კრასნიჩი.
კოსოვომ 2008 წელს გამოაცხადა სერბეთისგან დამოუკიდებლობა. მანამდე ათი წლით ადრე, 1998-1999 წლებში კოსოვოში ომი მიმდინარეობდა სერბეთის ჯარებსა და ალბანელ მეამბოხეებს შორის. ომი დასრულდა მას შემდეგ, რაც ნატოს 78-დღიანი საჰაერო კამპანიის შედეგად სერბეთის ჯარებმა დატოვეს რეგიონი და იქ საერთაშორისო სამშვიდობო ძალები განთავსდნენ.