IAEA-ის ხელმძღვანელის თქმით, აშშ შეიძლება დაუბრუნდეს ირანის ბირთვულ პროგრამაზე გარიგებას
გაეროს ატომური ენერგეტიკის სააგენტოს ხელმძღვანელმა, რაფაელ გროსიმ განაცხადა, რომ აშშ შეიძლება დაუბრუნდეს ირანის ბირთვული პროგრამის თაობაზე 2015 წელს მიღწეულ გარიგებას, მაგრამ აღნიშნა, რომ ორივე მხარემ უნდა გამოთქვას მოლაპარაკებებში მონაწილეობის სურვილი.
გროსიმ ეს განცხადება 16 მარტს გააკეთა ევროპარლამენტის სამი კომიტეტის წინაშე ონლაინ რეჟიმში გამოსვლისას.
აშშ-მა შეთანხმება 2018 წელს მიატოვა დონალდ ტრამპის პრეზიდენტობისას, მაგრამ აშშ-ის პრეზიდენტმა ჯო ბაიდენმა მიანიშნა, რომ ვაშინგტონს სურს, დაუბრუნდეს შეთანხმებას.
მაგრამ ვითარებას ართულებს ის, რომ ირანი არღვევს შეთანხმებას. დარღვევა ეხება, სხვათა შორის, გამდიდრებული ირანის რაოდენობას, რომლის შენახვის უფლებაც აქვს მას, ასევე გამდიდრების ხარისხს.
ექსპერტების თქმით, ირანის ამ ქმედების მიზანია, ზეწოლა განახორციელოს გარიგების მონაწილეებზე - რუსეთზე, ჩინეთზე, საფრანგეთზე, გერმანიასა და დიდ ბრიტანეთზე - და მათ მეტის გაკეთება მოსთხოვოს ირანის ეკონომიკაზე დამანგრევლად მოქმედი სანქციების შესამსუბუქებლად.
ირანი აცხადებს, რომ სანამ შეთანხმებით გათვალისწინებული პირობების დაცვას გააგრძელებს, აშშ უნდა დაუბრუნდეს შეთანხმებით ნაკისრ ვალდებულებებს და შეწყვიტოს სანქციები.
როცა გროსის ჰკითხეს იმის შესახებ, რომ ირანი მოითხოვს, აშშ-მა პირველმა გადადგას ნაბიჯი, მან თქვა, რომ „ტანგოს ცეკვისთვის ორნი არიან საჭირო“.