ეუთო-ში აშშ-ის წარმომადგენელი გმობს რუსეთში მზარდ რეპრესიებს რადიო თავისუფლების წინააღმდეგ
რადიო თავისუფალი ევროპა/რადიო თავისუფლებისა და USAGM-ის სხვა არხებზე თავდასხმა, „დამოუკიდებელი აზრისა და სამოქალაქო საზოგადოების ჩახშობისკენ მიმართული ფართო ძალისხმევის ანარეკლია“, - წერს აუსტრიანი აშშ-ისა და კანადის სახელით გაკეთებულ განცხადებაში. „ახალი რეგულაციები რუსეთში რთე/რთ-ის საინფორმაციო საქმიანობის ხელის შეშლას და ამით მისი მზარდი აუდიტორიის შემცირებას ისახავს მიზნად“.
მიუხედავად იმისა, რომ რუსეთის ხელისუფლებამ პირველად USAGM-ის არხები ამოიღო მიზანში, კორტნი აუსტრიანის თანახმად, შემდეგი სამიზნე შესაძლოა ეუთოს ნებისმიერი სახელმწიფოს მედია აღმოჩნდეს.
ამ განცხადების ფონია „როსკომნადზორის“ საჩივრის საფუძველზე, რადიო თავისუფლების დაჯარიმების შესახებ გამოტანილი განაჩენი.
რუსეთის სახელმწიფო მარეგულირებელმა, „როსკომნადზორმა“ რთე/რთ-ს ჯარიმები დაუწესა იმის გამო, რომ, მედიის მარეგულირებლის თანახმად, მედიაკორპორაცია არღვევდა „უცხოეთის აგენტების“ თაობაზე კანონს და თავის მასალებს არ უკეთებდა შესაბამის მარკირებას.
მოსკოვის ტვერის რაიონის სასამართლომ 3 მარტს არ დააკმაყოფილა რადიო თავისუფალი ევროპა / რადიო თავისუფლების სააპელაციო სარჩელი. რთე/რთ ასაჩივრებს პირველი ინსტანციის სასამართლოს 10 თებერვლის განაჩენს, რომლითაც სასამართლომ დაადასტურა კორპორაციისთვის „როსკომნადზორის“ მიერ დაკისრებული ჯარიმები.
„რთე/რთ კატეგორიულად ეწინააღმდეგება ჯარიმების თაობაზე გადაწყვეტილებას“, განაცხადა მედიაკორპორაციის პრეზიდენტმა ჯეიმი ფლაიმ. „ჩვენ არ ვეთანხმებით არც სასამართლოს დღევანდელ გადაწყვეტილებას ჩვენი საჩივრის უარყოფის თაობაზე“.
მანამდე აშშ-ის გავლენიან სენატორთა ორპარტიულმა ჯგუფმა მოუწოდა რუსეთის პრეზიდენტ ვლადიმირ პუტინს, რათა აღკვეთოს „სახელმწიფოს მიერ მხარდაჭერილი თავდასხმა“, რომელიც მედიის, კერძოდ, რადიო თავისუფალი ევროპა/რადიო თავისუფლების წინააღმდეგ არის მიმართული.
12 მარტს გაკეთებულ განცხადებაში, სენატის საერთაშორისო ურთიერთობათა კომიტეტის დემოკრატი და რესპუბლიკელი წევრები ყურადღებას ამახვილებენ რუსეთში მედიაგარემოს გაუარესებასა და სადავო „უცხოეთის აგენტის“ შესახებ კანონით აშშ-ის დაფინანსებული რადიო თავისუფალი ევროპა/რადიო თავისუფლების და ამ კორპორაციის სხვა პროექტების ჩახშობაზე.
ამერიკელი სენატორები პირადად რუსეთის პრეზიდენტს, ვლადიმირ პუტინს ადანაშაულებენ კანონმდებლობის გამკაცრებისათვის კრემლის კრიტიკოსების დასასჯელად და იმ ქმედებებისათვის, რომელიც სარისკოს ხდის ჟურნალისტების უსაფრთხოებას.