ევროკავშირი მოუწოდებს თურქეთს, დაუბრუნდეს ქალთა დაცვის ხელშეკრულებას
ევროკავშირის აღმასრულებელი ორგანოს, ევროკომისიის, ხელმძღვანელმა, ურზულა ფონ დერ ლაიენმა, სტამბოლის კონვენციაზე ხელისმომწერ ყველა ქვეყანას მოუწოდა, რატიფიცირება გაუკეთონ ხელშეკრულებას ტვიტერში 21 მარტს.
„ქალებს დაცვისათვის სჭირდებათ მტკიცე სამართლებრივი საფუძველი“, განაცხადა ფონ დერ ლაიენმა და დასძინა, რომ „ქალების მიმართ ძალადობა დაუშვებელია“.
ევროკავშირის საგარეო პოლიტიკისა და უსაფრთხოების პოლიტიკის ხელმძღვანელმა, ჟოზეპ ბორელმა სინანული გამოთქვა ანკარის გადაწყვეტილების გამო და თურქეთს მისი გაუქმებისკენ მოუწოდა. „იმედი გვაქვს, თურქეთი კვლავ შეუერთდება ქალებისა და გოგონების დაცვის ხელშეკრულებას, რომელიც 21-ე საუკუნეში ადამიანის უფლებათა დაცვის, მშვიდობის, უსაფრთხოებისა და თანასწორობის ფუნდამენტური ელემენტია“, დასძინა ბორელმა.
ევროსაბჭოს გენერალურმა მდივანმა, მარია რაიჩინოვიჩ ბურიჩმა, გადაწყვეტილებას უწოდა „გამანადგურებელი“. მისი თქმით, „ეს ნაბიჯი უდიდესი უკუსვლაა და განსაკუთრებით სამწუხაროა, რადგან საფრთხეს უქმნის ქალთა დაცვას თურქეთში, ასევე ევროპასა და მის გარეთ“.
ე.წ. სტამბოლის კონვენციის დატოვების შესახებ პრეზიდენტ რეჯეპ ტაიპ ერდოანის განკარგულება შაბათს გამოქვეყნდა.
საერთაშორისო ხელშეკრულება ევროსაბჭომ შეიმუშავა 2011 წელს და მისი მიზანია ძალადობისგან ქალების დაცვა და მასთან ბრძოლა. დოკუმენტს ხელი მოაწერეს სტამბოლში. თურქეთის სახელით მას ხელი მოაწერა ერდოანმა, მაშინდელმა თურქეთის პრემიერ-მინისტრმა.