კრისტიან დანიელსონი კვირის ბოლოს კვლავ ეწვევა საქართველოს
როგორც ამ შეხვედრის შემდეგ გავრცელებულ ცნობაშია ნათქვამი, დანიელსონის შუამავლობით საქართველოში მიმდინარე მოლაპარაკებების დროს პოლიტიკურმა პარტიებმა მიაღწეს გარკვეულ შეთანხმებას ხუთიდან სამ საკითხზე: საარჩევნო რეფორმებზე, მართლმსაჯულების რეფორმებსა და პარლამენტში ძალაუფლების განაწილებაზე. მაგრამ არსებობს გადაუდებელი საჭიროება, რომ პროგრესი მიღწეული იქნას ორ ყველაზე უფრო სადავო - პოლიტიზებული მართლმსაჯულებისა და მომავალი არჩევნების საკითხებში.
საქართველოს პოლიტიკურმა აქტორებმა უნდა გააცნობიერონ გაჭიანურებული კრიზისის მოსალოდნელი შედეგები, როგორც თავიანთი მოქალაქეების, ისე ევროკავშირ-საქართველოს ურთიერთობისთვის. აუცილებელია, რომ ყველა მოთამაშე სრულად იყოს ჩართული მედიაციის პროცესში, რომელიც მომავალ კვირაში განახლდება, - ნათქვამია ევროკავშირის ცნობაში.
ევროკავშირის მაღალჩინოსანი, შვედი დიპლომატი კრისტიან დანიელსონი 12 მარტიდან ჩაება ევროპული საბჭოს პრეზიდენტ შარლ მიშელის ინიციატივით და მისი პირადი მონაწილეობით 1 მარტს თბილისში დაწყებულ მედიაციის პროცესში.
12 მარტიდან, დანიელსონმა საქართველოს ოპოზიციისა და ხელისუფლების წარმომადგენლებთან გამართა არაერთი შეხვედრა როგორც ცალ-ცალკე, ისე ერთად. პროცესში მონაწილეობდნენ ევროკავშირის და აშშ-ის ელჩები, კარლ ჰარცელი და კელი დეგნანი. თბილისში გამართულ ბოლო, ერთობლივ შეხვედრაზე, რომელიც 18 მარტს, დღის სამი საათისთვის დაიწყო და გვიან ღამემდე გაგრძელდა, მხარეებმა შეთანხმებას ვერ მიაღწიეს.