საიტი "პერვაია კრიმსკაია" ადგურ არძინბას 60 მილიონის მითვისებაში ადანაშაულებს
საიტზე "პერვაია კრიმსკაია" (Первая крымская), გამოქვეყნდა პუბლიკაცია სახელწოდებით „ აფხაზეთში 60 მილიონის ოდენობის რუსული ინვესტიცია დაიკარგა“. ეს ფული „გრანდ ოტელ სუხუმის“ მშენებლობაზე უნდა დახარჯულიყო. გამოცემის თანახმად, რუსეთის სამართალდამცავი ორგანოები სწავლობენ რუსული ფინანსური დახმარების გაფლანგვის ფაქტს.
"პერვაია კრიმსკაია"-ს პუბლიკაციას ავტორი არ ჰყავს, თუმცა სტატიაში მითითებულია მისამართი სადაც იძებნება იმ დოკუმენტების ასლები, რომლითაც მასშტაბური გაფლანგვა ოკუპირებული აფხაზეთის ე.წ. ექსმინისტრსა და ამ დროისათვის ოპოზიციონერ პოლიტიკოსს ადგურ არძინბას ბრალდება. დოკუმენტების ასლები სოციალურ ქსელში დეფაქტო აფხაზეთის პრეზიდენტის ადმინისტრაციის უფროსის პირველი მოადგილის მრჩეველმა, ბლოგერმა სარია ჩამაგუამ გამოაქვეყნა.
დოკუმენტებით ირკვევა, რომ 2016 წელს, „გრანდ ოტელ სუხუმ2“-ის ანგარიდან შპს „იუგ სტროი კომპლექტის“ ანგარიშზე ორჯერ გადაირიცხა ჯამში 60 მილიონ რუბლზე მეტი. ორივეჯერ თანხა სოხუმის „სბერბანკში“ განაღდდა.
სასტუმროს მშენებლობა ამ დრომდე არ დასრულებულა. როგორც შპს „გრანდ ოტელ სუხუმ 2“-ის ხელმძღვანელი ოთარ კაკალია ირწმუნება, პროექტის დასასრულებლად კიდევ 23 მილიონი რუბლია საჭირო“.
იმის გასარკვევად, რა არის ამ ისტორიაში სიმართლე და საიდან გაჩნდა დოკუმენტები, რომლებიც სოციალური ქსელებით გავრცელდა, „ეხო კავკაზას“ კორესპონდენტმა მიმართა დე ფაქტო აფხაზეთის ე.წ. ეკონომიკის სამინისტროს პრეს-მდივანს გიორგი ბერზენიას, რომელიც ადგურ არძინბასთანაც მუშაობდა. საიტ "პერვაია კრიმსკაია"-ში გამოქვეყნებული პუბლიკაციის კომენტირებისას მან განაცხადა, რომ მორიგ ანონიმურ მასალებზე კომენტარს არ გააკეთებს.
„ადგურ არძინბამ თავადაც არაერთხელ მიმართა გენერალურ პროკურატურას არაერთი ასეთი გამოხტომის გამო, რათა მას სამართლებრივი შეფასება მიეცა. იგი ყოველთვის გამოხატავს გახსნილობას და მზადყოფნას უპასუხოს ნებისმიერ შეკითხვას და დაეხმაროს სამართალდამცავ ორგანოებს საჭიროების შემთხვევაში“, - განაცხადა გიორგი ბერზენიამ.
„ეხო კავკაზამ“ კომენტარისთვის მიმართა სარია ჩამაგუასაც, რომელსაც ეყრდნობა "პერვაია კრიმსკაია"-ში. „ეხო კავკაზამ“ მას კითხა, რამდენად დარწმუნებულია კორუფციის ამსახველი დოკუმენტების სანდოობაში.
„დოკუმენტები მე არაგულგრილმა მოქალაქეებმა გადმომცეს. ისინი ოფიციალურად უკვე გაგზავნილია პროკურატურაში. დარწმუნებული ვარ, რომ გენერალური პროკურატურა ამ დოკუმენტების ნამდვილობას ადვილად დაამტკიცებს. მიმაჩნია, რომ ასეთ საკითხებზე გაჩუმება არ შეიძლება. ყველაფერი ღიად და გამჭვირვალედ უნდა გაკეთდეს, რათა ხალხმა ყველაფერი იცოდეს. ამიტომ მიმაჩნია, რომ პროკურატურამ ხალხს უნდა წარუდგინოს დეტალური ანგარიში და არა მშრალი კომენტარი“,- უთხრა „ეხო კავკაზას“ სარია ჩამაგუამ.
შპს „გრანდ ოტელ სუხუმ2“-ის დირექტორი, ოთარ კაკალია, თავის მხრივ, ამტკიცებს, რომ საიტზე გამოქვეყნებული ინფორმაცია ყალბია:
„გენერალური პროკურატურა ამ საქმეზე ვერანაირ მოკვლევას ვერ აწარმოებს, რადგან აღნიშნულთან ყოფილ ეკონომიკის მინისტრს საერთო არაფერი აქვს...ყველაფერი დამაჯერებელი იქნებოდა, რომ არა ერთი მაგრამ. ეს არის კერძო თანხები და არა საბიუჯეტო. ეს არის ფული, რომელიც ჩვენს კომპანიას კომერციულმა ბანკმა მისცა. ეს არაა ის ფული, რომელიც სახელმწიფო ინვესტიციების ხაზით შემოვიდა. ეკონომიკის სამინისტრო ამ პროექტში ჩვენ დახმარებას გვიწევდა, რაც ნორმალური მოვლენაა...ჩვენი ბანკის მიერ გაცემულ დედანში მკაფიოდ წერია, რომ თანხა გაიგზავნა მშენებლობისათვის და ეს არის წინასწარი გადასახადი სამშენებლო-საკონტრაქტო სამუშაოებისათვის...ამ ყალბ გადახდის ქვითრებში კი კომპიუტერული შრიფტითაა დამატებული, რომ თანხა რაღაც საკონსულტაციო მომსახურებისთვის გადავიხადეთ. ნათელია, რომ ეს არის გაყალბებული და ამის მიზანი ადამიანებისთვის თვალებში ნაცრის შეყრაა“, - აღნიშნა ოთარ კაკალიამ. მან განაცხადა, რომ შეუძლებელი იქნებოდა სასტუმროს აშენება, 195 მილიონი რუბლიდან 60 მილიონი რომ მოეპარათ.
„ჩვენ ვაშენებთ მშვენიერ ობიექტს, მშვენიერი აუზით, პანორამული რესტორნით და ჩვენ 70 ადამიანს ვაძლევთ სამუშაოს. ჩვენ ვმუშაობთ და ყალბი ინფორმაციაში გარკვევის დრო არ გვაქვს. ეს რაღაც პოლიტიკური კინკლაობაა, ვიღაცას ვიღაცის ჩაძირვა სურს და ამ საქმეში მე მონაწილეობას არ ვღებულობ. ჩვენ მეწარმეები ვართ, დიდი ხანია პოლიტიკიდან წავედი“, - ამბობს „ეხო კავკაზასთან“ საუბარში ოთარ კაკალია. მისი თქმით, ობიექტი თითქმის დასრულებულია, ნაწილობრივ ფუნქციონირებს და ტურისტებსაც ემსახურება.
რუსეთის მიერ ოკუპირებული აფხაზეთის პრეზიდენტის ადმინისტრაციის ხელმძღვანელის მოადგილემ, ზურაბ ქაჯაიამ „ეხო კავკაზას“ უთხრა, რომ მისი თანაშემწე სარია ჩამაგუა უშტატო თანამშრომელი იყო და ამ დროისათვის იგი თანამდებობიდან გათავისუფლებულია.
ტექსტი შეიცავს ტერმინებსა და ტოპონიმიკას, რომლებიც გამოიყენება სამხრეთ ოსეთისა და აფხაზეთის თვითაღიარებულ რესპუბლიკებში.