სუეცის არხში განახლდა გემების მოძრაობა
წუხელ ღამით 37-მა გემმა გაიარა არხში, 30 მარტს მოელიან, რომ კიდევ 140 გაივლის და მოხერხდება საცობის გახსნა, რომელიც ასობით გემს აბრკოლებს უკანასკნელი დღეების განმავლობაში.
400 მეტრის სიგრძის Ever Given-ი, რომელსაც კონტეინერები მიაქვს აზიიდან ევროპაში, 23 მარტს შეჯდა მეჩეჩზე არხის იმ მონაკვეთში, სადაც ცალმხრივი მოძრაობაა. ინციდენტის გამო არხის ორივე მხარეს 400-ზე მეტი გემი მოგროვდა.
29 მარტს Ever Given-ი მეჩეჩიდან მოხსნეს. მას ახლა ღუზა აქვს ჩაშვებული ინციდენტის ადგილიდან ჩრდილოეთით, სადაც ინსპექცია უტარდება, რათა დადგინდეს, გამოსადეგია თუ არა ის ცურვისთვის. ამის თაობაზე ხომალდის ოპერატორი კომპანია Evergreen Marine-ი იტყობინება.
ხმელთაშუა და წითელი ზღვების დამაკავშირებელი სუეცის არხის მარშრუტზე მსოფლიო ვაჭრობის 12%-მდე მოდის. ეს ევროპასა და აზიას შორის დამაკავშირებელი უმოკლესი საზღვაო გზაა.
როგორც საზღვაო მონაცემთა კომპანია Lloyd's List-ი იტყობინება, Ever Given-ის ავარიით გამოწვეული ბლოკადა დღეში 9,6 მილიარდ დოლარ დანაკარგს წარმოადგენდა მსოფლიო ვაჭრობისთვის. ექსპერტები ვარაუდობენ, რომ ამის შედეგად გაძვირდება ევროპაში საქონლის ტრანსპორტირება მაშინ, როცა კორონავირუსის პანდემიის გამო ისედაც გასაჭირში იმყოფება მომარაგების ხაზები.