ფოფხაძე ივანიშვილზე: მოინდომა მარიხუანას კულტივაციის კანონპროექტის გატანა, 2 მილიარდი უნდა ვიშოვოო
პოლიტიკოს გედევან ფოფხაძის განცხადებით, “ქართული ოცნების” დამფუძნებელს, ბიძინა ივანიშვილს მარიხუანას კულტივაციის კანონპროექტის მიღება სურდა, რომელიც მას 2 მილიარდის მოგებას მოუტანდა. მისივე თქმით, ივანიშვილი უკმაყოფილო იყო იმით, რომ ეკლესია და “მორწმუნე ხალხი” ამის უფლებას არ აძლევდნენ.
“მოინდომა მარიხუანას კულტივაციის კანონპროექტის გატანა. ის საუბრობდა 2 მილიარდის თემაზე, 2 მილიარდი უნდა ვიშოვო და თქვენ და მორწმუნე ხალხი და ეკლესია არ მაძლევთ მაგის უფლებას… კი, უმრავლესობის სხდომაზე, ჩვენ გარდა, ერთი 60 კაცი იყო და ახლა იმედია, ვიღაცა ისინდისებს. იქ ძალიან აქტიურობდა ზვიად ძიძიგური, მირიან წიკლაური. მე გამოვრიცხავ ეხლა, რომ იმ ადამიანებმა, ვინც იქ იყვნენ და ამ კამათს უსმენდნენ, ყველამ დაივიწყოს ეს შინაარსი”, — განაცხადა გედევან ფოფხაძემ “მთავარი არხის” ეთერში.
მან ასევე აღნიშნა, რომ კანონპროექტს აქტიურად უჭერდა მხარს პარტია “საქართველოსთვის” თავმჯდომარე, გიორგი გახარია.
“გახარია იყო მთავარი ფიგურა, მან შემოიტანა კანონპროექტი, დაავალეს, რა თქმა უნდა”, — განაცხადა გედევან ფოფხაძემ.
მისივე თქმით, ბიძინა ივანიშვილი არის აგრესიული ათეისტი, რომელსაც უბრალოდ ღმერთის კი არ სწამს, ის ხალხიც კი აღიზიანებს, ვისაც ღმერთის სწამს. როგორც მან აღნიშნა, ამ აგრესიამ განსაკუთრებული პოლიტიკური ხორცი შეისხა მას შემდეგ, რაც მარიხუანის კულტივაციის კანონპროექტის გატანა მოინდომა.