ზალკალიანი უკრაინის ელჩის გაწვევაზე: მეჩვენება რომ ეს ორკესტრირებულ პროცესს ჰგავს
პრეზიდენტ ზელენკის მიერ საქართველოდან უკრაინის ელჩის გაწვევას „იმედის" ეთერში გამოეხმაურა საგარეო საქმეთა მინისტრი დავით ზალკალიანი. მისი შეფასებით, ეს ნაბიჯი ძნელად ასახსნელია.
„მე ვერ ვხსნი იმ გადაწყვეტილებას, თუ რატომ არ გაიწვია უკრაინამ ელჩი, მაგალითად ბელარუსიდან. მქონდა კომუნიკაცია ბევრ კოლეგასთან და იმ ადამიანებთან, რომლებსაც მსგავს კრიზისულ სიტუაციებში ქვეყნების შორის ურთიერთობის გამოცდილება აქვს, და ძალიან რთული ასახსნელია ეს ყველაფერი. დემარშის ეს დაბალი ფორმაც კი არაა გამოყენებული ამ შემთხვევაში. ამიტომ ძალიან გამიკვირდა ეს ყველაფერი. მეჩვენება, რომ ეს ორკესტრირებულ პროცესს ჰგავს და ამას თბილისშიც მოჰყვა გარკვეული მოვლენები. საზოგადოებაშიც ეს ძალიან ბევრ კითხვას იწვევს. მოლდაველ კოლეგასაც ვესაუბრე ამ და სხვა თემებზე. მათაც იდენტური პოზიცია აქვთ სანქციების კუთხით, თუმცა მე იქ ვერ ვხედავ საზოგადოების და ოპოზიციის ისეთ რეაქციას, რასაც აქ ვაწყდებით თბილისში, და ეს ყველაფერი აჩენს ეჭვებს“, - აცხადებს ზალკალიანი.
გუშინ, 28 თებერვალს, საქართველოდან ვერ გაფრინდა მოხალისეთა ის ჯგუფი, რომელიც ამბობდა, რომ უკრაინაში ჩასვლა და მეგობარი ქვეყნისთვის დახმარება სურდა.
უკრაინის პრემიერ-მინისტრმა დენის შმიჰალმა "ტვიტერზე", მათ შორის, ქართულ ენაზე გამოაქვეყნა ტექსტი, რომელშიც იმედს გამოთქვამს, რომ ქართველ მოხალისეებს უკრაინაში ჩასვლა შეეძლებათ.
"მამაცი ქართველი ძმები უკრაინის დასახმარებლად აეროპორტში ფრენას ელოდებიან. იმედია, ღარიბაშვილი გამბედაობას გამოიჩენს და ფრენის ნებართვას გასცემს. უკრაინა ამას ელოდება! ევროპა ამას ელოდება", - დაწერა მან.
დღეს, 1 მარტს კი, უკრაინაში ომის დაწყების მეექვსე დღეს უკრაინის პრეზიდენტმა საქართველოდან ელჩი გაიწვია, მათთვის დახმარების მსურველი მოხალისეებისთვის ხელის შეშლისა და სანქციებისადმი გამოხატული პოზიციების გამო.
"ქართული ოცნების" თავმჯდომარე ირაკლი კობახიძე საქართველოდან უკრაინის ელჩის გაწვევას ქვეყნის ომში "ჩათრევის" სურვილით ხსნის.
"სამხედრო კონფლიქტში ჩვენ ვერ ჩავერთვებით. იყო პირდაპირი მცდელობა, მოხალისეების გაგზავნის ორგანიზების ნაწილში, რომ ჩავრთულიყავით სამხედრო კონფლიქტში. ეს ვერ იქნა მიღწეული და ამას მოჰყვა ეს ძალიან სამწუხარო ნაბიჯი [ელჩის გაწვევა]..." - თქვა კობახიძემ.
24 თებერვალს რუსეთი უკრაინის ტერიტორიაზე სამხედრო ძალებით შევიდა და სრულმასშტაბიან საომარ მოქმედებებს ატარებს. რუსეთს შესაჩერებლად აშშ-მ, ევროკავშირმა, კანადამ, დიდმა ბრიტანეთმა და ა.შ. სანქციები დაუწესეს. საქართველოს პრემიერ-მინისტრი ირაკლი ღარიბაშვილი ამბობს, რომ "ეროვნული ინტერესებიდან" გამომდინარე, არ აპირებს შეუერთდეს ამ სანქციებს.