ვოლოდიმირ ზელენსკი: რუსეთს სურს, გაანადგუროს ყველა ევროპელის ნორმალური ცხოვრება
რუსეთს სურს, გაანადგუროს ყველა ევროპელის ნორმალური ცხოვრება, – ამის შესახებ უკრაინის პრეზიდენტმა ვოლოდიმირ ზელენსკიმ განაცხადა.
„ამ დღეებში რუსეთი ცდილობს, კიდევ უფრო გაზარდოს ენერგეტიკული ზეწოლა ევროპაზე. რუსეთს სურს, გაანადგუროს ყველა ევროპელის ნორმალური ცხოვრება – ჩვენი კონტინენტის ყველა ქვეყანაში. მას სურს, დაასუსტოს და დააშინოს მთელი ევროპა, ყველა სახელმწიფო. სადაც რუსეთი ამას ჩვეულებრივი იარაღით ვერ ახერხებს, ამას ენერგეტიკული იარაღით აკეთებს. ის ცდილობს, დარტყმა მოახდინოს სიღარიბით და პოლიტიკური ქაოსით, სადაც ჯერ კიდევ არ შეუძლია დარტყმის განხორციელება რაკეტებით. ამისგან თავის დასაცავად, ჩვენ ყველას ევროპაში გვჭირდება კიდევ უფრო მეტი ერთიანობა, კიდევ უფრო მეტი კოორდინაცია, კიდევ უფრო მეტი დახმარება ერთმანეთისთვის“, – აცხადებს უკრაინის პრეზიდენტი.
უკრაინის პრეზიდენტის თქმით, ზამთარში რუსეთი ემზადება გადამწყვეტი ენერგეტიკული დარტყმისთვის.
„ამ ზამთარს რუსეთი ემზადება ყველა ევროპელზე გადამწყვეტი ენერგეტიკული დარტყმისთვის და ამაზე მთავარი პასუხი უნდა იყოს ორი რამ: პირველი, ჩვენი ერთიანობა, ერთიანობა ტერორისტული სახელმწიფოსგან თავდაცვაში და მეორე – ჩვენი ზეწოლის გაზრდა რუსეთზე – ეს არის როგორც ყველა დონის სანქციების გაძლიერება, ასევე, რუსეთის ნავთობისა და გაზის შემოსავლების შეზღუდვა. რაც უფრო მეტ დარტყმას მივაყენებთ ერთად, მით უფრო ნაკლებ დარტყმას შეძლებენ ეს ტერორისტები“, – დასძენს უკრაინის პრეზიდენტი.