ოჯახში ძალადობას გაქცეული დაღესტნელი გოგოები საქართველოს დატოვებენ
დაღესტნელ გოგოებს, რომლებიც ოჯახში ძალადობას საქართველოში გაექცნენ, მალე მესამე ქვეყანაში გადაიყვანენ. ამის შესახებ რადიო თავისუფლებას ალექსანდრა მიროშნიკოვამ, უფლებადამცველი ორგანიზაცია СК SOS-ის პრეს-მდივანმა უთხრა.
„დაძაბული პერიოდის შემდეგ, რამდენიმე დღე დაისვენებენ. [შემდეგ] ვგეგმავთ მათ მესამე ქვეყანაში გადაყვანას… დეტალებს ვერ გავამხელთ, უსაფრთხოებიდან გამომდინარე“, - ამბობს მიროშნიკოვა.
ხადიჟატ და ფატიმატ ხიზრიევებს, ამინატ გაზიმაგომედოვას და ფატიმატ მაგომედოვას დაძაბული ღამის შემდეგ, რუსმა მესაზღვრეებმა საქართველოში შესვლის უფლება მისცეს 30 ოქტომბერს.
„გოგოები ძალიან ღელავდნენ, რომ ნათესავებს შეიძლება მოეკლათ. ამ დროს სერიოზულად განიხილავდნენ, რომ სახლში დაბრუნებას სუიციდი ერჩივნათ“, - ამბობს მიროშნიკოვა და ამატებს: „ქართველმა მესაზღვრეებმა მარტივად შემოუშვეს. უღიმოდნენ და ულოცავდნენ“.
მისივე თქმით, დაღესტნელი ბიძაშვილებს ნათესავები - მშობლები, უფროსი ძმები - რეგულარულად სცემდნენ, „დალაგების, გარეგნობის გამო, ან იმიტომ, რომ რომელიმე ნათესავი ცუდ ხასიათზე იყო“.
СК SOS-ს მათ ჯერ კიდევ ორი წლის წინ მიმართეს, მაგრამ მაშინ ერთ-ერთი მათგანი არასრულწლოვანი იყო.
„ერთ-ერთი გოგო უნდა გაეთხოვებინათ ბიძაშვილზე. ამან დააჩქარა გაქცევის გეგმები. თუმცა ეს დიდი ხანი უნდოდათ“, - ამბობს მიროშნიკოვა.