მელია: ჩვენი პოლიტიკური ძალის პრიორიტეტად რჩება თავისუფალ სამყაროსთან ინტეგრაცია, სააკაშვილის თავისუფლება
"ნაციონალური მოძრაობის" თავმჯდომარემ, ნიკა მელიამ პარტიის მთავარ ოფისში გამართულ ბრიფინგზე შეაჯამა მისი ვიზიტი ბრიუსელში. მელიას თქმით, პარტიის უმთავრეს პრიორიტეტად რჩება ქვეყნის თავისუფალ სამყაროსთან ინტეგრაცია და პრეზიდენტ სააკაშვილის თავისუფლება.
"ერთიანი ნაციონალური მოძრაობის სახელით ვაცხადებ, ჩვენი პოლიტიკური ძალის უმთავრესი პრიორიტეტი იყო არის და იქნება საქართველოს თავისუფალ სამყაროსთან ინტეგრაცია;
პრეზიდენტ სააკაშვილის თავისუფლება და მისი გადაყვანა დასავლურ სამედიცინო დაწესებულებაში;
ქვეყნის დემოკრატიული განვითარება და მედიის თავისუფლება", - თქვა ნიკა მელიამ.
მან, ასევე აღნიშნა, რომ ბრიუსელში პარტნიორებს ჰქონდათ "ერთიანი, მკაფიო პოზიცია", რომ ხელისუფლება არ ასრულებს ევროკავშირის კანდიდატობის რეკომენდაციებს.
"ამ ვიზიტის დროს ჩვენ კიდევ ერთხელ თალნათლივ დავინახეთ - ერთადერთი დაბრკოლება საქართველოს ევროინტეგრაციის გზაზე არის ბიძინა ივანიშვილი და მისი ხელისუფლება", - განაცხადა მელიამ.
ნიკა მელიამ, ასევე ისაუბრა "ევროპის სახალხო პარტიის" რეზოლუციაზეც. დოკუმენტით, ისინი ევროკავშირსა და პარტნიორებს ბიძინა ივანიშვილისთვის სანციების დაწესებისკენ, საქართველოს მთავრობას კი ყოფილი პრეზიდენტის მიხეილ სააკაშვილისა და ტელეკომპანია „მთავარი არხის“ გენერალური დირექტორის ნიკა გვარამიას გათავისუფლებისკენ მოუწოდებენ.
"რეზოლიციაში პირდაპირ აღნიშნულია, რომ სახელმწიფო მიტაცებულია და მტკიცედ დაფიქსირებულია ურყევი პოზიცია ოლიგარქ ივანიშვილის დასანქცირების აუცილებლობის შესახებ...
ამ აზრს ასევე იზიარებენ აშშ სენატში, სადაც ორი დღის წინ „საქართველოს უზარმაზარ უკუსვლად“ შეაფასეს პროცესები და საუბარი დაიწყეს საქართველოსთან მიმართებაში სტრატეგიის გადახედვის მიზაშეწონილობაზე", - აღნიშნა ნიკა მელიამ ბრიფინგზე.
მელიას თქმით, ბრიუსელში შეხვედრები ჰქონდა ევროპული საბჭოს პრეზიდენტ შარლ მიშელის წარმომადგენლებთან, საგარეო ქმედებათა სამსახურის აღმოსავლეთ პარტნიორობის დეპარტამენტის ხელმძღვანელთან, ევროკომისიის სამეზობლოსა და გაფართოების დეპარტამენტის ხელმძღვანელთან.