ბრიტანეთის სამხედრო დაზვერვა: სვატოვოს რაიონი რუსეთის ჯარების სუსტ ფლანგად იქცა
ბრიტანეთის სამხედრო დაზვერვა თავის ყოველდღიურ ანგარიშში აღწერს ვითარებას სვატოვოში, სადაც გრძელდება ბრძოლები.
ანგარიშის თანახმად, უკანასკნელი შვიდი დღის განმავლობაში ლუგანსკის ოლქის სვატოვოს რაიონში გრძელდება ინტენსიური სროლა არტილერიის გამოყენებით. ისევე, როგორც ფრონტის სხვა მონაკვეთებზე, რუსეთის ჯარები პრიორიტეტს ანიჭებენ თავდაცვითი პოზიციების შექმნას. სამინისტროს თანახმად, თითქმის დარწმუნებით შეიძლება ითქვას, რომ აქ რუსეთის ჯარები ცუდად გაწვრთნილი მობილიზებულებით არიან დაკომპლექტებული.
მაშინ, როცა რუსეთის ჯარების სამხრეთ-დასავლეთი ფრონტის ხაზი უკეთესადაა დაცული მდინარე დნეპრის აღმოსავლეთ ნაპირის გასწვრივ, სვატოვოს სექტორი, როგორც ჩანს, რუსეთის ჯარების უფრო მოწყვლად ფლანგად იქცა.
სვატოვო ლუგანსკის ოლქის მნიშვნელოვანი დასახლებული პუნქტია. ბრიტანეთის დაზვერვის თანახმად, რუსეთის ხელისუფლება, როგორც ჩანს, ქალაქზე კონტროლს პოლიტიკურ პრიორიტეტად განიხილავს. ამასთან, მეთაურებს პრობლემები ექმნებათ - მათ უნდა უზრუნველყონ სანდო თავდაცვა და ამავე დროს გამოძებნონ რესურსები სამხრეთით, დონეცკის რაიონში შეტევითი ოპერაციებისთვის.
რუსეთის ჯარების როგორც თავდაცვით, ისე შეტევით შესაძლებლობებს აბრკოლებს ამუნიციისა და კვალიფიცირებულ სამხედროთა დეფიციტი, შენიშნავს დიდი ბრიტანეთის სამხედრო დაზვერვა.