ხაჭაპურიძე სააკაშვილის განცხადებაზე: მან გიული ალასანიას სთხოვა, ეს საკითხი პოსტის სახით გამოექვეყნებინა
"იგი შექმნილ ვითარებაზე ესაუბრა დედამისს ქალბატონ გიული ალასანიას და რადგან თვითონ მას არ შეუძლია, სთხოვა ეს საკითხი პოსტის სახით გამოექვეყნებინა მის ფეისბუქ გვერდზე, რაც დედამ გააკეთა კიდეც. გაუგებარი მიზეზებით, რაღაც ჯგუფმა ამ პოსტის შექმნა გამოქვეყნებაში ქალბატონი ეკა ხერხეულიძე დადანაშაულა, რაც რბილად რომ ვთქვა, არაეთიკური და საქმეში ჩაუხედაობაა. ამ პოსტთან ქალბატონ ეკა ხედხეულიძეს არანაირი კავშირი არ აქვს და მეორეც ეს ადამიანი მიშას უანგარო და ერთგული თანამებრძოლია...", - წერს ხაჭაპურიძე საკუთარ ფეისბუქგვერდზე.
სააკაშვილის სავარაუდო მოწამვლასთან დაკავშირებით დღეს განცხადება გააკეთა მისმა კიდევ ერთმა ადვოკატმა, ვალერი გელბახიანმა.
"გუშინ ჩვენ ბატონ მიხეილ სააკაშვილთან ამ თემაზე საუბარი და კონსულტაცია გვქონდა. მას მიაჩნია, რომ ვიდრე ამ თემაზე შესაბამისი საექსპერტო დასკვნა არ იქნება, მანამდე ინტერპრეტაცია ყველანაირი სახით უნდა შეწყდეს. შევთანხმდით, რომ ჩვენც მოწამვლასთან დაკავშირებით კომენტარს აღარ მივცემთ და აქ ამოვწუროთ ყველაფერი", - თქვა ვალერი გელბახიანმა "ინტერპრესნიუსთან" საუბარში.
მიხეილ სააკაშვილის "ფეისბუკის" გვერდზე გავრცელებულ განცხადებაში წერია, რომ არცერთი ადვოკატისთვის არ უთქვამს არაფერი მის სავარაუდო მოწამვლასთან დაკავშირებით.
"დიდი მადლობა მინდა ვუთხრა სამედიცინო საზოგადოებას მხარდაჭერისთვის. ძალიან ვაფასებ მათ პროფესიულ თანადგომას. ჩემი ჯანმრთელობის მდგომარეობა მართლაც უარესდება და განსაკუთრებით დამძიმდა ამ ბოლო ორ თვეში. ვივამედის ექიმები მცდელობას არ აკლებენ. მნიშვნელოვანია, მივენდოთ სპეციალისტებს და ამ საკითხის ზედმეტი პოლიტიზება არ არის საჭირო", - წერს სააკაშვილი.
ინფორმაცია სააკაშვილის სავარაუდო მოწამლის შესახებ 19 ნოემბერს გავრცელდა. მისმა ადვოკატებმა და ოჯახის წევრებმა თქვეს, რომ მიხეილ სააკაშვილის კვლევის ნიმუშები პაციენტის ორგანიზმში მძიმე მეტალების სახიფათო რაოდენობის არსებობას ადასტურებდა და, რომ ეს ნიმუშები გადაგზავნილია ნიუ-იორკის ერთ-ერთ წამყვან კლინიკაში.
საქართველოს ექსპრეზიდენტი, უკრაინის მოქალაქე მიხეილ სააკაშვილი, რომელსაც ორ საქმეზე 6-წლიანი პატიმრობა აქვს მისჯილი, საქართველოში 2021 წლის სექტემბრის ბოლოს დაბრუნდა. ის თვითმმართველობის არჩევნების წინა დღეს, 1 ოქტომბერს დააკავეს. მის წინააღმდეგ აღძრულია საქმე სახელმწიფო საზღვრის უკანონო გადაკვეთის მუხლითაც და საქმე სასამართლო განხილვის ეტაპზეა.
დაკავების დღეს სააკაშვილმა შიმშილობა გამოაცხადა და პირველ ეტაპზე 50 დღე იშიმშილა, რის შედეგადაც, ექიმების შეფასებით, მისი მდგომარეობა თანდათან მნიშვნელოვნად დამძიმდა.
კლინიკა „ვივამედში“ მიხეილ სააკაშვილი 12 მაისის შემდეგ იმყოფება. ოჯახი ამბობს, რომ სააკაშვილის მდგომარეობა გამუდმებით მძიმდება, იუსტიციის სამინისტრო კი ამტკიცებს, რომ ექსპრეზიდენტი საქართველოში სრულფასოვან მკურნალობას იღებს და მისი გადაყვანა სამკურნალოდ სხვა ქვეყანაში არ განიხილება.
სააკაშვილის მოწამვლის შესახებ ვარაუდებს 20 ნოემბერს პენიტენციური სამსახური განცხადებით გამოეხმაურა. განცხადებაში ნათქვამი იყო, რომ ისინი არ იცნობენ "სააკაშვილის მოწამვლის დამადასტურებელ ოფიციალურ დასკვნას".