საქართველო მეტროს მოდერნიზაციისთვის EBRD-სგან 55,6 მლნ ევროს მიიღებს
საქართველოს ხელისუფლება თბილისის მეტროს მოდერნიზაციისთვის ევროპის რეკონსტრუქციისა და განვითარების ბანკისგან, დაახლოებით, 55,6 მლნ ევროს მიიღებს. ინფორმაციას საქართველოს ფინანსთა სამინისტროს პრესსამსახური ავრცელებს. ინფორმაციის თანახმად, სასესხო და საგრანტო შეთანხმებებს ხელი საქართველოს ფინანსთა მინისტრმა ლაშა ხუციშვილმა და EBRD-ის ვიცე-პრეზიდენტმა პოლიტიკისა და პარტნიორობის საკითხებში, მარკ ბოუმენმა მოაწერეს.
"პროექტის განმახორციელებელი იქნება ქალაქ თბილისის მუნიციპალიტეტის მერია, თბილისის სატრანსპორტო კომპანიის მეშვეობით", - აცხადებენ ფინანსთა სამინისტროში.
თბილისის მერი კახა კალაძე თანამდებობაზე მეორე ვადით მუშაობს. ის ჯერ კიდევ 2018 წელს ამბობდა, რომ რეაბილიტაცია ჩაუტარდებოდა თბილისის მეტროს რამდენიმე სადგურს.
„საზოგადოებრივი ტრანსპორტის მოწესრიგება ჩვენი ერთ-ერთი მთავარი პრიორიტეტია, რასაც აუცილებლად შევასრულებთ“, - თქვა კახა კალაძემ 2018 წლის 4 დეკემბერს.
ამ დრომდე არ დაწყებულა სარემონტო სამუშაოები მეტროსადგურ "ვარკეთილში", სადაც ჭერი 2018 წლის იანვარში ჩამოინგრა. დავით ნარმანიას მერობის დროს ამ სადგურის რეაბილიტაცია 347 848 ლარი დაჯდა.