თურქეთსა და სირიაში 8000-ს მიუახლოვდა მიწისძვრის შედეგად დაღუპულთა რიცხვი
თურქეთში 6 000-ს უახლოვდება დამანგრეველი მიწისძვრის შედეგად დაღუპულთა რიცხვი. წუხანდელი მონაცემებით, მიწისძვრამ იმსხვერპლა 5 894 ადამიანის სიცოცხლე. დაშავებულია 34 810. თურქეთის საგანგებო სიტუაციების სამმართველოს ინფორმაციით, დანგრეულია 5 775 შენობა.
დღეიდან ძალაშია პრეზიდენტ ერდოანის ბრძანება სტიქიური უბედურების ზონაში მოქცეულ 10 პროვინციაში, 3 თვით საგანგებო მდგომარეობის გამოცხადების შესახებ.
მიწისძვრას, რომლის ეპიცენტრი თურქეთის სამხრეთ-აღმოსავლეთში იყო, მსხვერპლი და ნგრევა მოჰყვა მეზობელ სირიაშიც, სადაც ამ დროისთვის ბოლო მონაცემებით, დაღუპულია 2030-ზე მეტი ადამიანი.
დამანგრეველი მიწისძვრა 6 თებერვალს მოხდა. თურქეთის საგანგებო სიტუაციების სამსახურის ცნობით, 7,7 მაგნიტუდის მიწისძვრის ეპიცენტრი ქვეყნის სამხრეთ-აღმოსავლეთში, კაჰრამანმარაშის პროვინციაში მდებარეობდა. ამერიკის შეერთებული შტატების გეოლოგიური სამსახურის მონაცემებით, მიწისძვრა 7,8 მაგნიტუდის იყო. 6 თებერვალს, შუადღის შემდეგ, ეპიცენტრში დაფიქსირდა კიდევ ერთი - 7,6 მაგნიტუდის მიწისძვრა.
8 თებერვლის დილის მდგომარეობით დადასტურებულია, რომ თურქეთში დაღუპულთა შორისაა საქართველოს 2 მოქალაქე.