თურქეთში 7000-ს გადააჭარბა მიწისძვრის მსხვერპლთა რიცხვმა
თურქეთის საგანგებო სიტუაციების სამმართველოს მიერ 8 თებერვალს, შუადღისთვის განახლებული მონაცემებით, ორი დღის წინ მომხდარი დამანგრეველი მიწისძვრის შედეგად დაიღუპა 7 108 და დაშავდა 40 910 ადამიანი.
სტიქიური უბედურების ზონაში მესამე დღეა გრძელდება სამძებრო-სამაშველო ოპერაცია, რომელშიც ჩართულია 79 110 თურქი და უცხოელი მაშველი. ნანგრევებში გადარჩენილთა პოვნის შესაძლებლობა სულ უფრო იკლებს.
მიწისძვრას, რომლის ეპიცენტრი თურქეთის სამხრეთ-აღმოსავლეთში იყო, მსხვერპლი და ნგრევა მოჰყვა მეზობელ სირიაშიც, სადაც ამ დროისთვის ბოლო მონაცემებით, დაღუპულია 2530 ადამიანი.
დამანგრეველი მიწისძვრა 6 თებერვალს მოხდა. თურქეთის საგანგებო სიტუაციების სამსახურის ცნობით, 7,7 მაგნიტუდის მიწისძვრის ეპიცენტრი ქვეყნის სამხრეთ-აღმოსავლეთში, კაჰრამანმარაშის პროვინციაში მდებარეობდა. ამერიკის შეერთებული შტატების გეოლოგიური სამსახურის მონაცემებით, მიწისძვრა 7,8 მაგნიტუდის იყო. 6 თებერვალს, შუადღის შემდეგ, ეპიცენტრში დაფიქსირდა კიდევ ერთი - 7,6 მაგნიტუდის მიწისძვრა.