რუსეთის მოქალაქეობაზე უარის მთქმელთა რიცხვი ბოლო 3 წელში ყველაზე მაღალია
2022 წელს, რუსეთის მოქალაქეობაზე უარი თქვა 4306-მა ადამიანმა, რაც ბოლო სამი წლის განმავლობაში ყველაზე მაღალი მაჩვენებელია. ამის შესახებ გამოცემა РБК წერს რუსეთის შინაგან საქმეთა სამინისტროსგან მიღებულ ოფიციალურ მონაცემებზე დაყრდნობით.
2020 წელს რუსეთის მოქალაქეობაზე უარი თქვა 3877-მა ადამიანმა, ხოლო 2021 წელს - 4055-მა. ამასთან, 2019 წელს რუსეთის მოქალაქეობაზე უარი თქვა კიდევ უფრო მეტმა, ვიდრე 2022 წელს - 4356-მა.
იმ 4306-დან, ვინც რუსეთის მოქალაქეობაზე უარი 2022 წელს თქვა, უშუალოდ რუსეთის ტერიტორიაზე მცხოვრებია მხოლოდ 40.
2022 წელს, წინა წელთან შედარებით 6,4%-ით შემცირდა მათი რიცხვიც, ვინც რუსეთის მოქალაქეობა მიიღო(691 000). რუსეთის მოქალაქეობის მიღების მაჩვენებელი მზარდი იყო 2018 წლიდან.
რუსეთის შსს-ს ოფიციალური სტატისტიკის თანახმად, მათ შორის, ვინც 2022 წელს რუსეთის მოქალაქეობა მიიღო, უმეტესობა - 43% უკრაინელია (297 000).
2022 წელს რუსეთის მოქალაქეობის მიმღებთა რაოდენობით მეორე ადგილზე არიან ტაჯიკეთის მოქალაქეები(174 000), შემდეგ - სომხეთის(45 000) და აზერბაიჯანის(23 000). ამავე სტატისტიკით, 2022 წელს რუსეთის მოქალაქეობა მიიღო საქართველოს დაახლოებით 3 000-მა მოქალაქემ.