ირაკლი ღარიბაშვილი მსოფლიოს მთავრობათა სამიტზე სიტყვით გამოვიდა
საქართველოს პრემიერ-მინისტრმა, ირაკლი ღარიბაშვილმა მსოფლიოს მთავრობათა სამიტზე ქვეყნის ეკონომიკურ მიღწევებზე ისაუბრა. დუბაიში გამართული ღონისძიებაზე ირაკლი ღარიბაშვილის სასაუბრო საკითხი "საქართველოს პოტენციალის ახალ ასპარეზზე გასვლა - გზა ეკონომიკურ კეთილდღეობამდე" იყო.
"საქართველოს აქვს 4 თავისუფალი ინდუსტრიული ზონა, ამ ზონებში საექსპორტო საქონელი იწარმოება და გადასახადებისგან თავისუფლდებიან. ეს ყველაფერი ხელს უწყობს საქართველოს, როგორც ბიზნესის კეთების მიმართულებად და დანიშნულების ადგილად ქცევას", - თქვა პრემიერმა და ასევე აღნიშნა, რომ მმართველმა პარტიამ ხელისუფლებაში ყოფნის დროს "საქართველო მსოფლიოში ბიზნესის კეთების ერთ-ერთ საუკეთესო ადგილად აქცია".
მისივე თქმით, მეწარმეობისა და ინოვაციების წახალისებული გარემოს შემუშავებით ქვეყანა იზიდავს ინვესტიციებს, იქმნება სამუშაო ადგილები და უმჯობესდება საქართველოს მოსახლეობის ცხოვრების დონე.
"რეგიონული ინვესტიციები ენერგეტიკის სფეროში და ინფრასტრუქტურაში, როგორიცაა შავი ზღვის წყალქვეშა ელექტროგადამცემი კაბელის განვითარება, ევრაზიის ნავთობის ტრანსპორტირების დერეფანი, შავი ზღვის თხევადი აირის პროექტი, რკინიგზის მოდერნიზაცია, აღმოსავლეთ-დასავლეთის მაგისტრალის მშენებლობა, ანაკლიის ღრმაწყლოვანი პორტის განვითარება გაზრდის ჩვენი რეგიონის და საქართველოს გამტარუნარიანობას. ეს პროექტები განსაკუთრებით აქტუალურია ევროპა-აზიის სავაჭრო დერეფნის დივერსიფიკაციის და გაფართოების მზარდი მნიშვნელობის გათვალისწინებით და იმის გაცნობიერებით, რომ ე.წ. შუა დერეფანი განიხილება არსებული მარშრუტები სასიცოცხლო მნიშვნელობის მქონე ალტერნატივად", - დასძინა მან.
პრემიერმა თქვა, რომ ეკონომიკური წინსვლის გათვალისწინებით, მისწრაფებაა საქართველო გახდეს ევროკავშირისა და ნატოს წევრი:
"გადამწყვეტი გზა გვაქვს წინ და ევროკავშირში გაწევრიანების გზაზე კანდიდატის სტატუსი ჩვენი შემდეგი ეტაპია".
საქართველოს პრემიერ-მინისტრი არაბთა გაერთიანებულ საამიროებში, დუბაიში გუშინ, 12 თებერვალს გაემგზავრა. ვიზიტის ფარგლებში ის შეხვდა არაბთა გაერთიანებული საამიროების ვიცე-პრეზიდენტს, პრემიერ-მინისტრს და დუბაის საამიროს მმართველს შეხვდა.