„ქართული ოცნებისთვის" მიცემული ვადა ამოიწურა - ვაშაძემ შემდგომი ნაბიჯები გამოაცხადა
მოთხოვნების შესრულების მიზნით, ხელისუფლებისთვის მიცემული ერთსაათიანი ვადის ამოწურვის შემდეგ, ოპოზიციის და სამოქალაქო ორგანიზაციების სახელით „სტრატეგია აღმაშენებლის" ლიდერმა გიორგი ვაშაძემ პარლამენტის წინ მიმდინარე აქციაზე შემდგომი ნაბიჯები გამოაცხადა. ამასთან, ვაშაძემ დემონსტრანტებს კვლავ სთხოვა მის მიერ დაყენებულ წინადადებაზე თანხმობის გამოცხადება, რაზეც მას ტაში დაუკრეს.
როგორც პოლიტიკოსმა თქვა, ხელისუფლება ამ დროის განმავლობაში მათთან კონტაქტზე არ გამოსულა. ამასთან, „ქართული ოცნების" წარმომადგენლებს არც საჯარო განცხადება გაუკეთებიათ აქციის ორგანიზატორთა მოთხოვნების შესახებ.
„ჩვენ გთავაზობთ შემდგომი ნაბიჯის გადადგმას. ეს გადაწყვეტილება არის, საინიციატივო ჯგუფის, ყველასი, აქ ვინც დგას, სხვადასხვა ჯგუფის. ორივე მხრიდან დავიძრათ პარლამენტის გარშემო და მოვაქციოთ ალყაში. ყველა შესასვლელთან განვლაგდეთ პარლამენტის გარშემო, - განაცხადა ვაშაძემ და დაამატა, რას იგეგმება, 9 მარტს, - ხვალ აპირებენ პარლამენტის სესიის ჩატარებას. ჩვენ უნდა მოვახდინოთ პიკეტირება და არ ჩავატარებინოთ სესია. მოვაქციოთ ალყაში პარლამენტი, რომელიც უნდა ემსახურებოდეს ხალხს და არ უნდა ემსახურებოდეს რუსულ ინტერესებს".
გიორგი ვაშაძის მოწოდების შემდეგ, აქციის მონაწილეები დაიძრნენ და უმაღლესი წარმომადგენლობითი ორგანოს შენობას წრეს არტყამენ.
დაახლოებით ერთი საათის წინ ხელისუფლების წინაშე ორი მოთხოვნა დააყენეს. ესენია: 7-8 მარტის აქციებზე დაკავებულთა გათავისუფლება და „უცხოელი გავლენის აგენტების შესახებ" კანონპროექტის გაწვევა.
7 მარტს პარლამენტმა საზოგადოების პროტესტის ფონზე პირველი მოსმენით მიიღო "უცხოური გავლენის გამჭვირვალობის შესახებ" კანონპროექტი.
კანონპროექტის განხილვის დაწყებისთანავე პარლამენტის შენობასთან მოქალაქეების შეკრება დაიწყო - ათასობით ადამიანი გამოვიდა ქუჩაში ე.წ. აგენტების კანონის მიღების წინააღმდეგ. მათი აღქმით, ამ კანონის მიღება საქართველოს რუსეთთან აახლოებს და მიზნად ისახავს თავისუფალი მედიის და არასამთავრობო სექტორის გაქრობას, კრიტიკული ხმის გაჩუმებას და საზოგადოების დაშინებას.
პარლამენტთან შეკრებილი მოქალაქეების დასაშლელად შსს-მ რამდენჯერმე გამოიყენა სპეციალური საშუალებები, მათ შორის წყლის ჭავლი, ცრემლმდენი გაზი და პილპილის აეროზოლი. დაშავდა ათობით ადამიანი. დემონსტრანტების ნაწილი პარლამენტთან მობილიზებულ სამართალდამცავებს და პარლამენტის შენობას ესროდა ქვებს და აალებადი სითხის შემცველ ბოთლებს. პოლიციამ 66 ადამიანი დააკავა და აღძრა სისხლის სამართლის საქმეც.