ქუთაისის ჩხობაძის კლინიკის პერსონალი ჯანდაცვის სამინისტროს მედიაციისთვის მიმართავს
ქუთაისის კლინიკის ექიმების, ექთნების და სხვა თანამშრომელთა უფლებების დამცველი ორგანიზაციის, სოლიდარობის ქსელის დამოუკიდებელი პროფკავშირის ხელმძღვანელის სოფო ჯაფარიძის განცხადებით, პერსონალი შრომით დავას დაიწყებს, რადგან ხელფასს რამდენიმე თვის დაგვიანებით ურიცხავენ. ამასთან, კლინიკის მმართველს აქვს მცდელობა თანამშრომლებს მათთან შეუთანხმებლად შეუმციროს სამუშაო საათები, რაც შრომის კანონის დარღვევაა. პროფკავშირის წარმომადგენლის თქმით, შრომითი ხელშეკრულებები იანვრიდან არ განახლებულა და თანამშრომლებმა არ იციან, რა პირობებით უნდა გააგრძელონ მუშაობა.
„მედპერსონალს არ აქვს შესაბამისი სამედიცინო აღჭურვილობა და დოკუმენტაციის წარმოებისთვის საჭირო საკანცელარიო ნივთებსაც კი თავად იძენენ. იშვიათად იღებენ ხელფასს და მასაც საავადმყოფოს გადასარჩენად ხარჯავენ“, – აცხადებს სოფო ჯაფარიძე და დასძენს, რომ იანვრიდან ექიმების და ექთნების ხელფასის ზღვრის დაწესების შემდეგ მათი ანაზღაურება გაიზარდა, თუმცა სანიტრებს და საავადმყოფოს სხვა თანამშრომლებს მინიმალურ ხელფასზე უწევთ მუშაობა.
სოფო ჯაფარიძის თქმით, თანამშრომლების სამუშაო პირობები მას შემდეგ გაუარესდა, რაც 2019 წლიდან კლინიკა რეგიონული ჯანდაცვის ცენტრის დაქვემდებარებაში გადავიდა. ცენტრის 100–% იანი წილის მფლობელია ჯანდაცვის სამინისტროს სტრუქტურაში შემავალი საქართველოს სამედიცინო ჰოლდინგი, რომელმაც სახელმწიფოს მფლობელობაში არსებული კლინიკების მართვა უნდა უზრუნველყოს.
ქუთაისის მულტიდისციპლინური კლინიკის თერაპიული განყოფილების ხელმძღვანელი ვახტანგ ხურციძე აცხადებს, რომ სამედიცინო დაწესებულების სწორად მართვა ვერ ხერხდება, რადგან ადმინისტრაციას გადაწყვეტილებების დამოუკიდებლად მიღება არ შეუძლია: „ეს შუალედური რგოლები, კლინიკის ადმინისტრაციას სწორ მართვაში ხელს უშლის“.
კლინიკის კოვიდგანყოფილების ხელმძღვანელი მაია შალამბერიძე ამბობს, რომ მართვის არსებული სისტემით უკმაყოფილო 300-მდე თანამშრომლის სურვილია, კლინიკამ მუშაობა დამოუკიდებლად გააგრძელოს და საკუთარი ბიუჯეტი თავად განკარგოს.
„ჩვენი კოლექტიური მოთხოვნაა უშუალოდ ჯანდაცვის სამინისტროს დავექვემდებაროთ და გვქონდეს მართვის უფლება, როგორც ეს 2019 წლამდე იყო. გვინდა ჩვენი ფინანსები ვმართოთ ჩვენ, კლინიკამ პანდემიის პერიოდში რაც გამოიმუშავა თანხა, ვერ მოიხმარა, მიუხედავად იმისა, რომ ერთ-ერთი დიდი კოვიდმიმღები ცენტრი ვიყავით, 135 საწოლფონდით. ველოდით, რომ გამომუშავებული თანხით კლინიკის ინფრასტრუქტურა და სერვისები გაუმჯობესდებოდა და ნებისმიერ კერძო კლინიკაზე წინ დავდგებოდით“.
მაია შალამბერიძის ინფორმაციით, იანვრის ხელფასი ექიმებს დღეს დილით, მას შემდეგ ჩაურიცხეს, რაც ჟურნალისტებს პრესკონფერენციის შესახებ შეატყობინეს.
კლინიკის ექთნის, ნატალია კობერიძის თქმით, მედიისთვის მოთხოვნების გაცნობა ორი კვირის წინაც სურდათ, თუმცა, მმართველმა თანამშრომლების ნაწილს ხელფასი ჩაურიცხა და პრესკონფერენციის გამართვა გადაიფიქრეს, მეორე დღეს კი რეგიონული ჯანდაცვის ცენტრისგან მიიღეს შეტყობინება დასაქმებულთა შემცირების შესახებ.
ნატალია კობერიძის თქმით, ეს განსაკუთრებით უარყოფითად აისახება ექთნებზე და კლინიკის სხვა თანამშრომლებზე, რადგან მოუწევთ ან დამატებითი დროით მუშაობა ან დადგენილ დროში უფრო მეტი პაციენტის მომსახურება.
„ექიმებს სამუშაო დრო უმცირდებათ და ექთნების შტატები მცირდება, რაც მომსახურების ხარისხზე აისახება, ისედაც ცოტა ვართ მედპერსონალი და კიდევ რომ შეგვამცირებენ ეს პირველ რიგში პაციენტებზე აისახება მერე ჩვენ ოჯახებზე, ბევრს საბანკო ვალდებულებები გვაქვს“.
ქუთაისის ჩხობაძის სახელობის მულტიდისციპლინური კლინიკის თანამშრომლები შრომითი დავის გადასაწყვეტად ჯანდაცვის სამინისტროს ოფიციალურად მიმართავენ და მედიაციის პროცესის დაწყებას მოითხოვენ.
ჯანდაცვის სამინისტროში აცხადებენ, რომ სამედიცინო პერსონალის მიერ მედიაციის მოთხოვნის შემთხვევაში ოფიციალური მედიატორი დაინიშნება.
რადიო თავისუფლება ესაუბრა რეგიონული ჯანდაცვის ცენტრის ხელმძღვანელს გიორგი აბაიძეს, რომლის ინფორმაციით, 7 აპრილს ქუთაისში თანამშრომლებს პირადად შეხვდება: „არ ვიცი რატომ გაჩნდა ეს მოთხოვნები და გასარკვევად ადგილზე გავესაუბრები თანამშრომლებს“.
გიორგი აბაიძე ჩხობაძის კლინიკის თანამშრომელთა საპასუხოდ განმარტავს, რომ პერსონალის მოთხოვნებს არ ეთანხმება. აბაიძის განცხადებით, თანამშრომლები ხელფასებს ყოველთვიურად იღებენ, თუმცა დასძენს, რომ კლინიკის თანამშრომლებს წლების განმავლობაში ხელფასი ჩამორჩენით ერიცხებათ, რისი გამოსწორებაც ჯერჯერობით ვერ მოხერხდა. „ხელფასს ყოველ თვეში ერიცხებათ, მაგალითად, იანვრის ხელფასი მარტში აიღეს და თებერვლისას ამ თვეში აიღებენ და გაჟღერდა თითქოს იანვრის შემდეგ ხელფასი არ აუღიათ, რაც არ არის სიმართლე“.
რეგიონული ჯანდაცვის ცენტრის ხელმძღვანელს განცხადებით, გაუგებარია რატომ ითხოვენ თანამშრომლები კლინიკის ცენტრიდან გამოყოფას და დამოუკიდებლად ფუნქციონირებას. მისივე თქმით, ცენტრს წელიწადია ხელმძღვანელობს, კლინიკის ადმინისტრაციასთან ხშირი ურთიერთობა აქვს და მსგავსი მოთხოვნების საფუძველი ამ დრომდე არ არსებობდა.
გიორგი აბაიძე არასწორ ინფორმაციას უწოდებს თანამშრომელთა სამუშაო საათების და კადრების შემცირების შესახებ კლინიკაში შეტყობინების გაგზავნას და ამბობს, რომ ცენტრის არც ერთ თანამშრომელს არ ემუქრება შემცირება, რადგან უწყება კადრების დეფიციტს განიცდის.