თითქოს წამალი რომ მივცეთ, ყველაფერი შეიცვლება - ღარიბაშვილი აქონდროპლაზიის მქონე ბავშვებზე
საქართველოს პრემიერ-მინისტრი ირაკლი ღარიბაშვილი ამბობს, რომ აქონდროპლაზიის დიაგნოზის მქონე ბავშვების სიცოცხლეს საფრთხე არ ემუქრება. მან მთავრობის სხდომის დაწყებამდე ისაუბრა ამ ბავშვებსა და მათ მშობლებზე, რომლებიც იმ დროს ისევ მართავდნენ აქციას მთავრობის ადმინისტრაციის შესასვლელთან.
აქონდროპლაზიის დიაგნოზის მქონე ბავშვების საკითხზე გადასვლამდე, ირაკლი ღარიბაშვილმა ისაუბრა ახალ სახელმწიფო პროგრამაზე, რომლითაც სრულად დაიფარება 300-მდე ონკოლოგიური პაციენტი ბავშვის საზღვარგარეთ მკურნალობა.
"მინდა კარგად ავუხსნა ჩვენს საზოგადოებას და ძვირფას მშობლებს, მე მესმის მათი ემოციურობის. ვინც არ არის ამ საქმეში ჩახედული, ისე წარმოაჩინეს "მიეცით წამალი ბავშვებს", თითქოს, წამალი რომ მივცეთ, ყველაფერი შეიცვლება. იმასაც კადრულობენ, თითქოს, მათ სიცოცხლეს ემუქრება საფრთხე, რაც ძალიან დიდი ტყუილია... ძალიან ბევრი ადამიანი ვიცით მთელ მსოფლიოში, რომლებიც არიან წარმატებული და მათი დისკრიმინაცია არ შეიძლება, ჩვენ ამაზე უნდა ვიყოთ მოწოდებული", - განაცხადა ღარიბაშვილმა და აღნიშნა, რომ ამ მედიკამენტის შემოტანაზე სახელმწიფოს უარი არ უთქვამს.
საქართველოს პრემიერ-მინისტრმა ასევე თქვა, რომ "ქვეყანა, სადაც ეს წამალი გამოიგონეს, თავად არ აფინანსებს".
"უპასუხისმგებლო პოლიტიკოსები, რომლებიც გამოირჩევიან სიყალბით და ფარისევლობით, ცდილობენ უმწიკვლო ბავშვები დაიყენონ წინ და აწარმოონ პოლიტიკური კამპანია. მე მინდა მათ [აქონდროპლაზიის დიაგნოზის მქონე ბავშვების მშობლებს] ვუთხრა, რომ ჩვენ, მთავრობა, სახელმწიფო, მათ გვერდით დგას. ჩვენ გავაკეთებთ ყველაფერს, რაც საჭიროა. მაგრამ მე მინდა მათ ვთხოვო, ნუ გამოაყენებინებენ თავს და ნუ მიიღებენ ამ პოლიტიკურ კამპანიაში მონაწილეობას, ნებსით თუ უნებლიეთ...
[პოლიტიკოსები] ცდილობენ ყველა უბედურება თუ განსაცდელი, გაჭირვებაში მყოფი ადამიანების ბედი გამოიყენონ საკუთარი პოლიტიკური ინტერესების მისაღწევად, რაც ამორალურია, უზნეობაა, ყველაზე ზნედაცემული ქმედებაა, როცა ვუყურებთ ასეთი იშვიათი გენეტიკური დაავადებების ჩართულობით უნდათ პოლიტიკურ დივიდენდებს მიაღწიონ", - აღნიშნა მან.
საქართველოს პრემიერ-მინისტრმა თქვა, რომ მოთხოვნილი მედიკამენტის შემოტანის შემთხვევაში, სახელმწიფო იღებს პასუხისმგებლობას მისგან მოსალოდნელ საფრთხეებზე.
"ჩვენ უარს არ გეუბნებით. თანხაზე არ არის საუბარი, 10 მილიონზეა საუბარი - თანხა არ არის ჩვენთვის პრინციპული და კრიტიკული. ღმერთმა დაიფაროს, თუ ამ წამლის მიცემით ისე შეიძლება გართულდეს ამ ბავშვების ჯანმრთელობის მდგომარეობა, რომ უფრო ცუდად წავიდეს, რა თქმა უნდა, ამ შემთხვევაში იქნება ჩვენი პასუხისმგებლობა. ეს, რა თქმა უნდა, არ გვინდა, რომ მოხდეს. საჭიროა მოცდა", - თქვა პრემიერმა.
ირაკლი ღარიბაშვილის ამ განცხადებას აქონდროპლაზიის მქონე ბავშვების დედები უსმენდნენ მთავრობის ადმინისტრაციის შესასვლელში, სადაც ბოლო რამდენიმე დღეა, აქციას მართავენ. მათი მოთხოვნა, პრემიერ-მინისტრის ამ განცხადების მიუხედავად, არ შეცვლილა.
წელიწადზე მეტია, აქონდროპლაზიის მქონე ბავშვების დედები პრეპარატ "ვოსორიტიდის" შემოტანასა და დაფინანსებას ითხოვენ. მშობლების ნაწილი ბოლო რამდენიმე დღეა, ღამეებს მთავრობის კანცელარიასთან ათენებს. აქცია გაიმართა გუშინ, 23 აპრილსაც და დღესაც.
აქციის ორგანიზატორები აცხადებენ, რომ ეს წამალი სასიცოცხლოდ მნიშვნელოვანია აქონდროპლაზიის სინდრომის მქონე ბავშვებისთვის და მის მიღებას მხოლოდ 14-16 წლის ასაკამდე აქვს შედეგი.
საქართველოს შრომის, ჯანმრთელობისა და სოციალური დაცვის მინისტრის მოადგილის, თამარ გაბუნიას თქმით, "ვოსორიტიდის" საქართველოში შემოტანის პროცედურებს მხოლოდ იმ შემთხვევაში დაიწყებენ, თუ მიმდინარე წლის სექტემბრის ბოლომდე, ევროკავშირის თუნდაც რამდენიმე ქვეყანაში დადასტურდება ამ მედიკამენტით პაციენტების უზრუნველყოფა.