ხუხაშვილი: ზურაბიშვილს გვარამიას შეწყალება უნდოდა, მაგრამ ივანიშვილმა უთხრა, რომ ეს წითელი ხაზი იყო

„მე ყოველთვის ვამბობდი, რომ ამ ქალბატონის რიტორიკა სწორია, მაგრამ რეალურად, ბიძინა ივანიშვილს სარგებელს აძლევდა ის, რასაც ზურაბიშვილი აკეთებდა. პრეზიდენტი ევროპაში რომ დადიოდა, ამ ხელისუფლებას და პირადად მას [ბიძინა ივანიშვილს] უკეთებდა სასარგებლო საქმეს, ესენი რეფორმებს არ ატარებდნენ, მაგრამ პრეზიდენტი „ჩალიჩობდა“, რომ კანდიდატის სტატუსი დაუმსახურებლად მიგვეღო“, – ამის შესახებ პოლიტოლოგმა გია ხუხაშვილმა ტელეკომპანია „კავკასიის“ ეთერში განაცხადა.

მისივე თქმით, ზურაბიშვილს ბრიუსელში ვიზიტამდე „მთავარი არხის“ დამფუძნებლის, ნიკა გვარამიას შეწყალება სურდა, მაგრამ ბიძინა ივანიშვილმა უთხრა, რომ ეს წითელი ხაზი იქნებოდა.

„რაც შეეხება, რატომ მოხდა ბრიუსელში ვიზიტის გადადება, იმისათვის, რომ პრეზიდენტი იქ ჩასულიყო და მის სიტყვას ფასი ჰქონოდა, უნდა შეეწყალებინა გვარამია. ეს მის პოზიციებს მაქსიმალურად გაამყარებდა და იქ ტრიბუნაზე გამოვიდოდა როგორც გმირი. მას უნდოდა ამ ნაბიჯის გადადგმა, მაგრამ უთხრეს, რომ ეს იყო წითელი ხაზი, ივანიშვილმა უთხრა. გვარამიას არ შეწყალება ნიშნავდა, რომ ეს გამოიწვევდა გარკვეულ ობსტრუქციას მის მიმართ ბრიუსელში, ამიტომ ჩაშალა ვიზიტი, რადგან რომ ჩასულიყო იცოდა, რომ იქაც „გაბანძდებოდა“, წითელი ხაზის გადაკვეთის კი ეშინია.

ზურაბიშვილი მივიდა იმ წერტილში, როცა ლაპარაკს აზრი აღარ აქვს, მან ამ თავისი ლაპარაკით ქვეყნის შიგნით და ქვეყნის გარეთ ყველა „დააბოლა“, მაგრამ როცა ქმედებაზე გადასვლის დრო მოვიდა, გვარამია არ შეიწყალა. ახლა ზურაბიშვილი ხვდება, რომ მის ლაპარაკს აზრი არ აქვს და წავიდა ბუჩქებში“, – განაცხადა ხუხაშვილმა.

შეგახსენებთ, 18 აპრილს, სტრასბურგში დაგეგმილი საქართველოს პრეზიდენტის სალომე ზურაბიშვილის ვიზიტი, სადაც პრეზიდენტი ევროპარლამენტის წინაშე სიტყვით უნდა გამოსულიყო, გადაიდო.

პრეზიდენტის ადმინისტრაციის განცხადებით, სალომე ზურაბიშვილის ვიზიტი სტრასბურგში, სადაც ის ევროპარლამენტარების წინაშე სიტყვით უნდა გამოსულიყო, მთავრობის მხრიდან ხელოვნურად გაჭიანურებული თანხმობის მიღების პროცესის გამო გადაიდო.