აქონდროპლაზიის მქონე ბავშვების მშობლებმა თავისუფლების მოედანზე გზა გადაკეტეს
თავისუფლების მოედანზე რამდენიმე წუთით საავტომობილო გზა გადაკეტეს აქონდროპლაზიის მქონე ბავშვების მშობლებმა და აქციის სხვა მონაწილეებმა.
მთავრობის ადმინისტრაციის შენობასთან მყოფმა მშობლებმა მსვლელობის მოწყობა მას შემდეგ გადაწყვიტეს, რაც პრემიერ-მინისტრ ირაკლი ღარიბაშვილის განცხადება მოისმინეს.
წელიწადზე მეტია, აქონდროპლაზიის მქონე ბავშვების დედები პრეპარატ „ვოსორიტიდის" შემოტანასა და დაფინანსებას ითხოვენ. მშობლების ნაწილი ბოლო რამდენიმე დღეა, ღამეებს მთავრობის ადმინისტრაციის შენობასთან.
მშობლები ამჟამად კვლავ მთავრობის ადმინისტრაციასთან იმყოფებიან და აცხადებენ, რომ აქციას 25 აპრილსაც გამართავენ.
აქონდროპლაზიის მქონე ბავშვების მშობლები ისევ პრემიერ-მინისტრთან შეხვედრას მოითხოვენ.
პრემიერ-მინისტრმა მთავრობის დღევანდელ სხდომაზე განაცხადა, რომ აქონდროპლაზიის მქონე ბავშვების სიცოცხლეს საფრთხე არ ემუქრება. ირაკლი ღარიბაშვილმა ასევე თქვა, რომ "ქვეყანა, სადაც ეს წამალი გამოიგონეს, თავად არ აფინანსებს".
აქციის ორგანიზატორები აცხადებენ, რომ ეს წამალი სასიცოცხლოდ მნიშვნელოვანია აქონდროპლაზიის სინდრომის მქონე ბავშვებისთვის და მის მიღებას მხოლოდ 14-16 წლის ასაკამდე აქვს შედეგი.
საქართველოს შრომის, ჯანმრთელობისა და სოციალური დაცვის მინისტრის მოადგილის, თამარ გაბუნიას თქმით, "ვოსორიტიდის" საქართველოში შემოტანის პროცედურებს მხოლოდ იმ შემთხვევაში დაიწყებენ, თუ მიმდინარე წლის სექტემბრის ბოლომდე, ევროკავშირის თუნდაც რამდენიმე ქვეყანაში დადასტურდება ამ მედიკამენტით პაციენტების უზრუნველყოფა.