ტელეწამყვან მიშა მშვილდაძეზე თავდასხმის საქმეზე ერთი პირი დააკავეს
შინაგან საქმეთა სამინისტროს ინფორმაციით, ტელეკომპანია „ფორმულის" წამყვან მიშა მშვილდაძეზე თავდასხმის საქმეზე ერთი პირი დააკავეს, სისხლის სამართლის კოდექსის 126-ე (ძალადობის) მუხლის საფუძველზე. შსს-ს პრესცენტრში რადიო თავისუფლებას არ დაუზუსტეს დაკავებულის ვინაობა.
გავრცელებული ცნობით, დაკავებულია ნიკოლოზ გუგეშაშვილი, ვისი სახელითაც „ფეისბუკის" გვერდზე გამოქვეყნდა პოსტი, რომ მან სცემა მიშა მშვილდაძეს. „ფეისბუკ"-ანგარიშზე, სადაც ეს „აღიარებითი ჩვენება" 28 ივნისს გამოქვეყნდა, საჯაროდ მხოლოდ ეს ერთი სტატუსი იძებნება. გვერდის და პიროვნების ავთენტურობა დადგენილი არ არის.
ნიკოლოზ გუგეშაშვილმა „ფეისბუკზე" გამოქვეყნებულ სტატუსში მონიშნა შინაგან საქმეთა სამინისტრო და დაწერა, რომ არ აპირებს მიმალვას და ძალადობის ფაქტის დამალვას. აქვე მან განმარტა, რომ მიშა მშვილდაძე სამიზნედ აირჩია მისი საჯარო განცხადებების, შეხედულებების და დამოკიდებულებების გამო.
ნიკოლოზ გუგეშაშვილის სახელით ფეისბუკის სტატუსი თითქმის მსგავსია პარტია "გირჩი - მეტი თავისუფლების" ლიდერის, ზურაბ გირჩი ჯაფარიძის თავდასხმის ბრალდებით დაკავებული სოსო მაისურაძის განცხადებისა, რომელიც მან ასევე ფეისბუკის საშუალებით გაავრცელა. მაისურაძე გუგეშაშვილის მსგავსად მიუთითებდა, რომ არ აპირებდა მიმალვას და თავდასხმის მიზეზად ასახელებდა ზურა ჯაფარიძის შეხედულებებს.
ტელეკომპანია „ფორმულის" ერთ-ერთ დამფუძნებელსა და ტელეწამყვანს, მიშა მშვილდაძეს 27 ივნისს თბილისში თავს დაესხნენ.
მიშა მშვილდაძეზე თავდასხმის საქმის სპეციალური საგამოძიებო სამსახურისთვის გადაცემის საკითხს აყენებს საქართველოს სახალხო დამცველი ლევან იოსელიანი.