ზურაბიშვილი ევროკავშირის წევრი ქვეყნების ელჩებს და ოპოზიციას შეხვდა
პრეზიდენტთან შეხვედრის შემდეგ პარტია „მოქალაქეების" ლიდერმა, დეპუტატმა ალეკო ელისაშვილმა განაცხადა, რომ ზურაბიშვილი მის მიმართ იმპიჩმენტს არ გამორიცხავს.
„რა თქმა უნდა, ვისაუბრეთ, პრეზიდენტის მოსალოდნელ იმპიჩმენტთან დაკავშირებით. მინდა გითხრათ, რომ თავად პრეზიდენტი ამას არ გამორიცხავს და აბსოლუტურად რეალურად მიიჩნევს, რომ ეს მოხდეს. შემდეგ რა უნდა გააკეთოს, ამაზეც ნაფიქრი აქვს აშკარად და სასიამოვნო მოსასმენი იყო. საკმაოდ მწყობრი ხედვა აქვს, რა უნდა გააკეთოს იმპიჩმენტის შემთხვევაში", - თქვა პოლიტიკოსმა.
ელისაშვილმა არ დააკონკრეტა, რა იგულისხმება ზურაბიშვილის ხედვაში და აღნიშნა: „სულ რომ მაწამონ და სული ამომხადონ, მაინც არ დავუჭერთ იმპიჩმენტს მხარს, მაგრამ გამოცდილებიდან გამომდინარე, დარწმუნებული ვარ, ფრიდონ ინჯია მხარს დაუჭერს და თუ ვინმე დაუჭერს, ეს იქნება „ნაციონალურმა მოძრაობა“.
ფრაქცია „ერთიანი ნაციონალური მოძრაობა - ძალა ერთობაშია"-ს წევრმა ანა წითლიძემ ზურაბიშვილთან შეხვედრის შემდეგ განაცხადა, რომ პრეზიდენტი იმპიჩმენტის საკითხზე ნაკლებად ღელავს. წითლიძის განცხადებით, „ნაციონალური მოძრაობა" სალომე ზურაბიშვილის იმპიჩმენტს მხარს არ დაუჭერს.
„პირველ რიგში პრეზიდენტთან საუბარი იყო კანდიდატის სტატუსთან დაკავშირებით, ეს არის პირველი და უმთავრესი საკითხი, რომელიც იმპიჩმენტზე მეტად აღელვებს (რაც საუბარში გამოიკვეთა) საქართველოს პრეზიდენტს. იმპიჩმენტზე ნაკლებად ღელავს, - აღნიშნა დეპუტატმა და მედიას ამ საკითხზე მისი პარტიის პოზიცია გააცნო, - მე შემიძლია, ვთქვა ერთი რაღაც - ჩვენი პოზიცია იმპიჩმენტთან დაკავშირებით არის ეს: ჩვენ მხარს არ ვუჭერთ. უფრო მეტიც, რომ დავაზღვიოთ იმპიჩმენტის საკითხი, ჩვენ შეგვიძლია ვქნათ ძალიან მარტივი რაღაც - როდესაც იმპიჩმენტის საკითხი დადგება კენჭისყრის დღის წესრიგში, ოპოზიციის არცერთი წევრი არ უნდა შევიდეს სასესიო დარბაზში და ამით გამოირიცხოს ყველანაირი სპეკულაცია".
საქართველოს პრეზიდენტი 12 სექტემბერს ასევე შეხვდა ევროკავშირის წევრი ქვეყნების ელჩებს.
საკონსტიტუციო სასამართლოში 12 სექტემბერს საპარლამენტო უმრავლესობის წარმომადგენელმა პრეზიდენტის იმპიჩმენტის საკითხზე წარდგინება შეიტანა. საქართველოს პრეზიდენტის, სალომე ზურაბიშვილის წინააღმდეგ საკონსტიტუციო სასამართლოში წარდგინებას საპარლამენტო უმრავლესობის 80-მა დეპუტატმა მოაწერა ხელი.
როგორც მმართველი პარტიის თავმჯდომარემ, ირაკლი კობახიძემ განმარტა, სალომე ზურაბიშვილმა უხეშად დაარღვია საქართველოს კონსტიტუცია და მთავრობის თანხმობის გარეშე დაიწყო ვიზიტების სერია საზღვარგარეთის ქვეყნებში.
80 დეპუტატს შორის ერთ-ერთი პარლამენტის თავმჯდომარე შალვა პაპუაშვილია. მისი თქმით, პრეზიდენტს ედავებიან ქვეყნის კონსტიტუციის 52-ე მუხლის დარღვევას, რომლის მიხედვითაც: „[პრეზიდენტი] მთავრობის თანხმობით ახორციელებს წარმომადგენლობით უფლებამოსილებებს საგარეო ურთიერთობებში, აწარმოებს მოლაპარაკებებს სხვა სახელმწიფოებთან..."
საკონსტიტუციო სასამართლოში შესატანი წარდგინებისთვის საჭიროა მინიმუმ 50 დეპუტატის თანხმობა.
„ქართულმა ოცნებამ“ პრეზიდენტ სალომე ზურაბიშვილის იმპიჩმენტის პროცედურა რამდენიმე დღის წინ დაიწყო. როგორც მმართველი პარტიის თავმჯდომარემ, ირაკლი კობახიძემ განმარტა, სალომე ზურაბიშვილმა უხეშად დაარღვია საქართველოს კონსტიტუცია და მთავრობის თანხმობის გარეშე დაიწყო ვიზიტების სერია საზღვარგარეთის ქვეყნებში.
მიმართვის შემდეგ საკონსტიტუციო სასამართლომ ერთი თვის ვადაში უნდა წარუდგინოს პარლამენტს დასკვნა, ამის შემდეგ კი პარლამენტმა პოლიტიკური ვერდიქტი უნდა გამოიტანოს და გადაწყვიტოს, დააყენებს თუ არა კენჭისყრაზე პრეზიდენტის იმპიჩმენტის საკითხს.
გასულ კვირაში საქართველოს პრეზიდენტმა შეხვედრები გამართა გერმანიის, ბელგიისა და საფრანგეთის დედაქალაქებში.
პრეზიდენტის იმპიჩმენტისთვის პარლამენტში 100 დეპუტატის თანხმობაა საჭირო. დღევანდელი მოცემულობით, საქართველოს 150-წევრიან პარლამენტს 140 მოქმედი დეპუტატი ჰყავს. მათგან საპარლამენტო უმრავლესობაში შედის 80-ზე მეტი დეპუტატი, საპარლამენტო ოპოზიციაში კი - 56.