კახა კალაძე ირაკლი ეძგვერაძეს "კრიმინალს" უწოდებს და ამბობს, რომ მასზე თავდასხმასთან კავშირი არა აქვს
„ქართული ოცნების“ გენერალური მდივნის კახა კალაძის განცხადებით, საკრებულოს ოპოზიციონერ წევრ ირაკლი ეძგვერაძეზე თავდასხმასთან კავშირი არც მას აქვს და არც გლდანის მაჟორიტარ დეპუტატ კოტე ზარნაძეს.
კახი კალაძე ირაკლი ეძგვერაძეს კრიმინალად მოიხსენიებს და ამბობს, რომ მომხდარი მის წარსულს უკავშირდება. მისი სიტყვებით, ეძგვერაძე გლდანში არჩევნების დროს ნიკა მელიას მთავარი საყრდენი იყო.
"ეს არის მორიგი სიბინძურე ბატონი მელიას მხრიდან, რომელიც იმ „შპანას“ ხელმძღვანელობს, რომელსაც ეძგვერაძე და ძმანი მისნი წარმოადგენენ. ეს არის პოლიტიკური სპეკულაციები. ნახსენები იყო ჩემი და კოტე ზარნაძის სახელი. ასეთი სიტყვიერი დაპირისპირებები საკრებულოში ძალიან ბევრჯერ ყოფილა, მაგრამ ეს ყველაფერი რჩება საკრებულოს კედლებს შიგნით, არასდროს ყოფილა შემთხვევა, რომ ვინმე ვინმეს დაპირისპირებოდა შემდეგ. ის, რაც მოხდა, ყველაფერი უკავშირდება ბატონ ეძგვერაძეს და მის წარსულს... ეს იყო ჩვეულებრივი კრიმინალი, რომელსაც უნდოდა ქურდობა, შემდეგ არ გამოუვიდა ეს, შემდეგ ქუჩის ბიჭობდა და მელიას დასაყრდენი იყო გლდანში, ახალგაზრდებს სცემდა, აშანტაჟებდა, შეურაცხყოფას აყენებდა“, - განაცხადა კახა კალაძემ ჟურნალისტებთან საუბრისას.
საკრებულოს დეპუტატს ირაკლი ეძგვერაძეს საკუთარ სახლთან 40-მდე პირი დაესხა თავს და სცემა.
მოგვიანებით კი, მის სანახავად გლდანში, მის სახლთან მისული ნიკა მელია, ბაჩო დოლიძე და ზვიად კუპრავა ადმინისტრაციული წესით დააკავეს.
მელიამ დაკავებამდე განაცხადა, რომ საკრებულოს დეპუტატს ფიზიკურად იმის გამო გაუსწორდნენ, რომ ის კალაძის მეგობარ დეპუტატ კოტე ზარნაძეს სხდომაზე დაუპირისპირდა.
ეძგვერაძეზე თავდასხმა მას შემდეგ მოხდა, რაც დედაქალაქის საკრებულოს სხდომაზე, „ქართული ოცნების" დეპუტატი კოტე ზარნაძე და „ნაციონალური მოძრაობის“ დეპუტატი ერთმანეთს დაუპირისპირდნენ, რაც შეხლა-შემოხლაში გადაიზარდა. როგორც ენმ-ს წევრები აცხადებენ, სწორედ, ამის გამო დახვდნენ სახლთან ირაკლი ეძგვერაძეს.