სტანო ოჩამჩირეში რუსეთის ფლოტის ბაზაზე: უკანონოა, რეგიონში სტაბილურობას მეტ საფრთხეს შეუქმნის
ევროკავშირი გამოხატავს ძლიერ შეშფოთებას რუსეთის გეგმების შესახებ გავრცელებული შეტყობინების გამო, ოკუპირებულ აფხაზეთში რუსეთის შავი ზღვის ფლოტის მუდმივი საზღვაო ბაზის შექმნასთან დაკავშირებით, - ამის შესახებ ნათქვამია ევროკავშირის უმაღლესი წარმომადგენლის, ჟოზეპ ბორელის პრესსპიკერის, პეტერ სტანოს განცხადებაში. განცხადების თანახმად, თუ რუსეთი გააგრძელებს ამ გეგმების განხორციელებას, „ეს კიდევ უფრო გაზრდის დაძაბულობას და რეგიონში სტაბილურობას მეტ საფრთხეს შეუქმნის“.
„რუსეთის მიერ სამხედრო ძალების ყოლა საქართველოს თვითგამოცხადებულ რეგიონებში - აფხაზეთსა და სამხრეთ ოსეთში - უკანონოა. ეს არღვევს საქართველოს სუვერენიტეტსა და ტერიტორიულ მთლიანობას, საერთაშორისო სამართლის პრინციპებს და რუსეთის მიერ აღებულ საერთაშორისო ვალდებულებებს, მათ შორის 2008 წლის 12 აგვისტოს შეთანხმებასა და 2008 წლის 8 სექტემბერს ხელმოწერილ დოკუმენტს ამ შეთანხმების განმახორციელებელი ზომების შესახებ", - ნათქვამია განცხადებაში, რომლის მიხედვით, ევროკავშირი მხარს უჭერს საქართველოს დამოუკიდებლობას, სუვერენიტეტსა და ტერიტორიულ მთლიანობას ქვეყნის საერთაშორისოდ აღიარებულ საზღვრებში.
2008 წლის 12 აგვისტოს ევროკავშირის მაშინდელი მორიგე თავმჯდომარე ქვეყნის, საფრანგეთის პრეზიდენტი ნიკოლა სარკოზი თბილისში მოსკოვიდან ჩამოვიდა და თან რუსეთის პრეზიდენტთან შეთანხმებული გეგმა ჩამოიტანა, რომელსაც, ოფიციალური ინფორმაციით, გარკვეული ცვლილებების შემდეგ, საქართველომ 15 აგვისტოს, ხოლო რუსეთმა 16 აგვისტოს მოაწერეს ხელი.
მიუხედავად ამისა, დოკუმენტი ცნობილია 12 აგვისტოს ხელშეკრულების სახელით. მას ხშირად და სხვადასხვა დონეზე უწოდებენ სარკოზი-მედვედევის ექვსპუნქტიან გეგმასაც. თბილისი კი იმთავითვე ამტკიცებდა, რომ დოკუმენტი სახელწოდებით სარკოზი-მედვედევის ექვსპუნქტიანი გეგმა, ბუნებაში არ არსებობს.
ქართულ მხარეს პრეტენზიები ჰქონდა დოკუმენტის მე-6 პუნქტთან დაკავშირებით, რომელიც სამხრეთ ოსეთისა და აფხაზეთის სამომავლო სტატუსის გარშემო საერთაშორისო მოლაპარაკებების გამართვას ითვალისწინებდა. ხელისუფალთა განცხადებით, დოკუმენტიდან ამ მოთხოვნის ამოღება თავად სარკოზის აქტიური ჩარევის შემდეგ გახდა შესაძლებელი.
საბოლოოდ, რუსეთმა არათუ არ შეასრულა ევროკავშირის შუამავლობით ხელმოწერილი შეთანხმება, არამედ მალე, 2008 წლის 26 აგვისტოს, სამხრეთ ოსეთისა და აფხაზეთის დამოუკიდებლობა ცნო.
რუსეთის პრეზიდენტ ვლადიმირ პუტინთან შეხვედრის შემდეგ, ოკუპირებული აფხაზეთის დე ფაქტო პრეზიდენტმა ასლან ბჟანიამ გამოცემა „იზვესტიისთვის" მიცემულ ინტერვიუში ილაპარაკა ოჩამჩირეში რუსეთის სამხედრო-საზღვაო ფლოტის ბაზის განთავსების გეგმის შესახებ.
რუსული სამხედრო-საზღვაო ბაზის მუდმივი პუნქტის განთავსების საკითხს 6 ოქტომბერს მედიასთან საუბარში გამოეხმაურა ევროკავშირის ელჩი საქართველოში და გეგმას "უკიდურესად შემაშფოთებელი" უწოდა.
საქართველოს პრემიერ-მინისტრის შეფასებით, გადაწყვეტილება არის "ოკუპაციის გაგრძელება" და "უფრო აუარესებს ამ სიტუაციას, რომელიც თან ახლავს ოკუპაციას".
საქართველოს საგარეო საქმეთა სამინისტრომ შეშფოთება გამოხატა და მსგავს ქმედებებს უწოდა„მორიგი პროვოკაციული მცდელობა“, რომელიც მიმართულია „აფხაზეთისა და ცხინვალის რეგიონების უკანონო ოკუპაციის ლეგიტიმაციისკენ“.
საქართველოს პრეზიდენტის, სალომე ზურაბიშვილის განცხადებით, "ეს დიდი ნაღმია შავი ზღვის უსაფრთხოებისა და საქართველოს ევროპული გზისათვის". ზურაბიშვილი საქართველოს პარტნიორებსა და საერთაშორისო საზოგადოებას მყისიერი რეაგირებისკენ მოუწოდებს.