კაიროში ღაზაში ვითარების მოწესრიგებასთან დაკავშირებული სამიტი მიმდინარეობს
იორდანიის მეფე აბდულამ პალესტინა-ისრაელის კონფლიქტის მოგვარებაში მიუკერძოებელი მიდგომისკენ მოუწოდა და აღნიშნა, რომ არაბულ ქვეყნებს სურთ მშვიდობა როგორც ისრაელისთვის, ასევე პალესტინელებისთვის.
პალესტინის ავტონომიის ხელმძღვანელმა მაჰმუდ აბასმა თავის გამოსვლაში ხაზი გაუსვა, რომ პალესტინელები თავიანთ მიწაზე დარჩებიან.
ბაჰრეინის მეფის ჰამად ბინ ისა ალ ხალიფას თქმით, ახლო აღმოსავლეთში მშვიდობა მანამ არ დამყარდება, სანამ უზრუნველყოფილი არ იქნება პალესტინელი ხალხის, მათ შორის დამოუკიდებელი სახელმწიფოს შექმნის, უფლება.
თავის მხრივ, ღონისძიების ორგანიზატორმა, ეგვიპტის პრეზიდენტმა აბდელ ფატაჰ ალ-სისიმ განაცხადა, რომ კაირო ეწინააღმდეგება პალესტინელების პოტენციურ გადაადგილებას ეგვიპტის ტერიტორიაზე. ალ-სისის თქმით, პალესტინის საკითხის ერთადერთი გადაწყვეტა მხოლოდ მათთვის დამოუკიდებელი სახელმწიფოს შექმნით შეიძლება.
კაიროს სამიტს 34 ქვეყნის და სამი საერთაშორისო ორგანიზაციის - გაეროს, არაბული სახელმწიფოების ლიგისა და აფრიკის კავშირის წარმომადგენლები ესწრებიან.
ღონისძიებაზე არ არიან წარმოდგენილნი შეერთებული შტატები, ისრაელი და, ასევე, ირანი, რომელიც პოლიტიკურად და ფინანსურად მხარს უჭერს „ჰამასს“. დამკვირვებლების აზრით, ამან შეიძლება შეამციროს სამიტის შედეგების ეფექტურობა.
Reuters-ის წყაროები თვლიან, რომ მონაწილეები ერთობლივ განცხადებას არ გააკეთებენ „ჰამასის“ საქმიანობისა და ისრაელის მიერ თავდაცვის უფლების გამოყენების გარშემო უთანხმოების გამო.