G20-ის ვიდეოშეხვედრაზე შოლცმა პუტინს მიმართა, „შეწყვიტოს უკრაინაზე თავდასხმა“
გერმანიის კანცლერმა ოლაფ შოლცმა 22 ნოემბერს განაცხადა, რომ
რუსეთის პრეზიდენტს მოუწოდა, გაიყვანოს ჯარები უკრაინიდან და დაასრულოს ომი. ეს მოხდა "დიდი ოცეულის" ვიდეოშეხვედრაზე, რომელშიც უკრაინაში ომის დაწყების შემდეგ პუტინმა პირველად მიიღო მონაწილეობა.
„მე მოვუწოდე პრეზიდენტ პუტინს, შეწყვიტოს ეს თავდასხმა და გაიყვანოს თავისი ჯარი უკრაინის ტერიტორიიდან, რათა ეს ომი ბოლოს და ბოლოს დასრულდეს“, - უთხრა შოლცმა ჟურნალისტებს პრესკონფერენციაზე ბერლინში, რომელიც იტალიის პრემიერ-მინისტრ ჯიორჯია მელონისთან ერთად გამართა.
მელონი მიესალმა პუტინის წინადადებას უკრაინაში მშვიდობისთვის მუშაობის შესახებ, მაგრამ განაცხადა, რომ „არ უნდა დაგვავიწყდეს, რომ უკრაინაში არიან აგრესორი და მხარე, რომელსაც თავს დაესხნენ. რუსეთისთვის საკმარისია ჯარების გაყვანა დაკავებული ტერიტორიიდან“.
პუტინი არ დასწრებია "დიდი ოცეულის“ ბოლო ორ სამიტს - ინდოეთსა და ინდონეზიაში გამართულ სამიტებზე მან საგარეო საქმეთა მინისტრი სერგეი ლავროვი გაგზავნა.
„დიდი ოცეული“ მოიცავს მსოფლიოში ეკონომიკურად წამყვან 19 ქვეყანას და მათთან ერთად ევროკავშირსა და აფრიკის კავშირს.